- El Principáu vuelve a garrar una iniciativa pionera que punxo en marcha pela primer vez en 2018, primero que nenguna otra comunidá
- La formación y la inspección van ser los otros dos pilares d’una iniciativa que va movilizar más de 622.000 euros d’inversión
El Gobiernu d’Asturies presentó güei el Programa pa la Prevención de la Ludopatía 2022-2024, que va centrar los esfuerzos nos ámbitos educativu y sanitariu, amás de nos llabores d’inspección y control. El Principáu reedita asina esta iniciativa pionera n’España, yá que cuando se punxo en marcha’l primer programa, en 2018, nenguna comunidá disponía d’una ferramienta d’estes característiques.
La inversión directa prevista pa tola vixencia del plan xube a 622.365 euros, a lo qu’habría que sumar toes aquelles acciones que se van llevar a cabu con recursos propios.
La conseyera de Facienda, Ana Cárcaba, presentó güei les principales llinies del programa xunto cola titular d’Educación, Lydia Espina, y el conseyeru de Salú, Pablo Fernández Muñiz, con motivu del Día Internacional del Xuegu Responsable, que se celebra’l 17 de febreru. Nes sos intervenciones, esplicaron que’l programa contempla, amás de midíes nos planes educativos y sanitarios, acciones de formación, información, control y inspección, como les siguientes:
- Estratexes de sensibilización y concienciación dirixíes sobre manera a población mozo y families.
- Actividaes de formación a dellos colectivos (fuercies y cuerpos de seguridá, empleaos públicos, profesoráu y personal de les empreses de xuegu) que garanticen el conocimiento de la legislación en materia de xuego y apuestes, n’especial, la relativa a les prohibiciones d’accesu y práctica, mesmo que como sobre mecanismos de detección de comportamientos de riesgu y recursos p’atender los trestornos asociaos al xuegu.
- Actuaciones nel ámbitu escolar, cola mira d’impulsar hábitos de vida afayadizos y promover l’ociu saludable ente l’alumnado.
- Acciones nel ámbitu de la inspección y control rellacionaes col protocolu de menores y prohibíos, la interconexión de rexistros d’interdicciones d’accesu al xuegu y la ellaboración d’un plan d’inspección con especial atención a colectivos vulnerables.
- Iniciatives dende l’atención sanitaria, que contemplen midíess dirixíes a proporcionar l’atención terapéutica adecuada nel Serviciu de Salú (Sespa) a les persones afectaes por un trestornu de conducta como l’adicción ensin sustancia (ludopatía) y al so entornu.
El primer Programa de Prevención de la Ludopatía allargóse un añu más de lo previsto, por cuenta de la pandemia, una y bones la situación sanitaria obligó a retardar distintes actividaes programaes. La puesta en marcha del segundu programa garantiza la continuidá de les polítiques empecipiaes en 2018.
Nesti sentíu, la conseyera de Facienda valoró’l trabayu desenvueltu dende’l Serviciu de Xuegu del Executivu autonómicu nos últimos años. En concreto, destacó’l decretu d’ordenación del sector aprobáu va un añu, que dexó, ente otres cuestiones, establecer restricciones en materia de xuegos y apuestes y afitar los criterios que rixen la concesión d’autorizaciones n’Asturies. Con esa norma, el Principáu buscaba un crecimientu ordenáu y sostenible del ámbitu del xuegu, con una ufierta respetuosa y responsable, que tuviera en cuenta la protección imprescindible de los colectivos más vulnerables, mesmo que la viabilidá de les empreses y la calidá del empléu.