El grupu colombianu Indaer de servicios técnicos pal sector aereu asitia n’Asturies la so sede pa Europa y Oriente Mediu

  • La base operativa va allugase nel Parque Tecnolóxicu de Llanera, onde se prevé invertir 700.000 euros y crear hasta una decena d’empleos de cualificación alta 
  • La compañía ufierta asistencia integral que cubre’l ciclu completu de vida de les aeronaves a firmes de leasing, aerollinies, fabricantes y propietarios 
  • Ye’l sestu proyectu empresarial que s’implanta na comunidá nel marcu de la Estratexa d’Atracción d’Inversiones  
  • “El Principáu demuestra la so capacidá pa la captación de proyectos en sectores d’un valor añedíu altu”, valora’l conseyeru d’Industria

El grupu colombianu Indaer, especializáu na prestación de servicios técnicos pal sector aereu, va coordinar dende Asturies toles sos actividaes pa Europa y los países d’Oriente Mediu. La compañía anunció güei qu’escoyó’l Principáu pa instalar la so base operativa en dambos mercaos, onde opera dende va dos décades, anque hasta agora nun cuntaba con sede permanente.

La implantación de la sede de la multinacional foi presentada pol conseyeru d’Industria, Empléu y Promoción Económica, Enrique Fernández, nun actu al qu’asistieron Juan Carlos Osorio, CEO d’Indaer, y Daniel Restrepo, director d’operaciones de la empresa y responsable de la sede nueva n’Asturies. Tamién participó Eva Pando, directora xeneral del Idepa.

Enrique Fernández manifestó’l so contentu pol anunciu del grupu Indaer, el sestu proyectu d’inversión que decide implantase n’Asturies nel marcu de la Estratexa d’Atracción d’Inversiones. Al so paecer, la llegada de la compañía confirma que’l Principáu ta convirtiéndose nun polu d’atracción d’inversiones”. “Ta demostrando que ye un llugar afayadizu pal desenvolvimientu d’actividaes empresariales nueves en tolos ámbitos y sectores d’actividá”, valoró.

Na so opinión, a la decisión d’Indaer y d’otres compañíes tán contribuyendo “los recursos endóxenos y les ventayes competitives d’Asturies”, amá del “trabayu escelente de los equipos técnicos del Idepa dedicaos a l’atracción de proyectos empresariales”. “Lo que ta asocediendo nun ye frutu de la casualidá; hai munchu llabor de prospección, análisis y evaluación d’inversores potenciales”, precisó.

La llegada d’Indaer abre la puerta a un sector d’actividá nuevu na comunidá, con potencial de medría a un plazu mediu y llargu. La inversión calculada algama los 700.000 euros y cúntase cola creación d’ocho a diez empleos de personal de cualificación alta nos primeros años. La plantiya va tener la base operativa nel Parque Tecnolóxicu d’Asturies, en Llanera, y va sofitar a lo demás del equipu nel so centru corporativu nel continente americanu. 

Indaer súmase a los cinco proyectos confirmaos dende’l llanzamientu de la Estratexa d’Atracción d’inversiones en xunu del 2020: Mind Facilities Management, Bedrock Inteligence, TEAM EQ, Preco y Sía Eight. Cola implantación d’Indaer captáronse hasta agora inversiones por valor de 220,7 millones que suponen la creación de 209 puestos de trabayu

El Grupu Indaer

Indaer Aviation Technical Services S.A.S. fundóse nel 2002 como empresa especializada na prestación de servicios técnicos y caltenimientu pa empreses del sector aereu. Nestes dos décades, evolucionó pa convertise nuna compañía más adaptada, eficiente y enfocada al negociu de la xestión d’activos y transición d’aeronaves. Los servicios técnicos que da tán certificaos baxo l’estándar de calidá de la industria aeroespacial AS-9100.

La firma ufierta a empreses d’arrendamientu (leasing), aerollinies, fabricantes y propietarios una ufierta que cubre’l ciclu completu de vida de les aeronaves: les transiciones (entregues y devolución d’aeronaves); inspecciones interines, evaluación d’operadores y provisores de servicios, xestión mentes s’executen servicios mayores, rexistros técnicos, ellaboración de programes de caltenimientu y sofitu mentes se negocien contratos.

La oficina nueva d’Indaer n’Asturies va tar dirixida por Daniel Restrepo, ún de los socios fundadores del grupu.  

Deja una respuesta

Tu dirección de correo electrónico no será publicada.

diecisiete − ocho =