El Principáu llega a un alcuerdu con Hispasat pa implantar na comunidá dos proyectos pilotu de conectividá rural vinculaos a los sectores turísticu y agroalimentariu

  • El presidente Adrián Barbón y el conseyeru de Ciencia, Borja Sánchez, visitaron güei les instalaciones del operador en Madrid pa buscar alternatives qu’impulsen la conexón vía satélite n’árees de mal accesu

El Gobiernu d’Asturies y la empresa Hispasat, principal operador de satélites de comunicaciones y motor de la industria aeroespacial española, llegaron güei a un alcuerdu pa implantar dos proyectos pilotu de conectividá rural asociaos a los sectores turísticu y agroalimentariu, dambos prioritarios pal desenvolvimientu económicu de la comunidá.

El Principáu pretende dar un impulsu más a les telecomunicaciones mediante la conectividá vía satélite pa llegar a ciertes zones, sobre manera rurales, onde güei nun ye posible otru tipu de conexón. Con esti fin, el presidente, Adrián Barbón, y el conseyeru de Ciencia, Innovación y Universidá, Borja Sánchez, visitaron en Madrid la sede d’Hispasat, del grupu Rede Eléctrica, onde alcordaron llinies de collaboración.

La conectividá vía satélite ye una de les opciones que valora la Conseyería de Ciencia pa complementar l’esplegue de los planes d’estensión de la banda ancha de los últimos años. La superposición de los distintos programes de meyora de les telecomunicaciones prevé cubrir cuasimente al 100 % de la población.

Garantizar la conectividá ye un primer pasu indispensable pa llograr la tresformación dixital del territoriu rural. La orografía asturiana complica l’accesu a determinaes zones onde nun pue llegar la fibra óptica y nes que se precisen alternatives d’otros tipos. Una de les alternatives ye l’esplegue de la tecnoloxía 5G, que va dexar ampliar la conectividá al territoriu, non solo a los núcleos de población como les actuales redes. Otra opción ye la telecomunicación vía satélite, que facilita l’accesu a internet dende cualquier puntu.

Nesti sentíu, Hispasat tien en marcha distintos proyectos pa llevar la conectividá al mediu rural, como internet n’espacios públicos, con conexones de 100 Megabytes (Mb), que dan serviciu tanto a población como a territoriu; telemedicina, dixitalización educativa y aplicada a la agroganadería y la xestión municipal y forestal, ente más otros.

La visita del presidente y del conseyeru de Ciencia a Madrid da continuidá a los contactos empecipiaos en payares con Hispasat de cara a abrir víes de collaboración. Tres l’alcuentru col presidente y el conseyeru delegáu de la compañía, Jordi Hereu y Miguel Ángel Panduro, respectivamente, algamóse l’alcuerdu de que l’operador implante dos planes pilotu n’Asturies p’ameyorar la conectividá rural. Estos programes de conectividá vía satélite enmarquense en dos de los sectores productivos clave pal Principáu: el turísticu y l’agroalimentariu. ​​​​​​​

Deja una respuesta

Tu dirección de correo electrónico no será publicada.

5 + 7 =