- La marca turística que formen el Principáu, Galicia, Cantabria y el País Vascu dobla’l so presupuestu pa esti exerciciu .
El Gobiernu del Principáu asume güei la coordinación de los trabayos de la España Verde, la marca territorial qu’integren Asturies, Galicia, Cantabria y País Vascu, col apoyu de Turespaña, y que tien como oxetivu fundamental asitiar la cornisa cantábrica como destín turísticu alternativu.
Asturies empecipia esti periodu de coordinación con un presupuestu que dobla al del exerciciu anterior y coles mires d’impulsar ente les cuatro comunidaes proyectos financiaos con fondos europeos. Asina mesmo, la marca turística tien como otru de los sos propósitos fundamentales la reactivación del mercáu internacional na cornisa cantábrica.
La conseyera de Cultura, Política Llingüística y Turismu, Berta Piñán, recibió’l testigu simbólicu de la coordinación nel estand de Fitur en Cantabria, comunidá qu’hasta agora asumía esta responsabilidá, de manos del so conseyeru de Turismu, Francisco Javier López Marcano. Nel actu tamién tuvieron presentes el vicepresidente y conseyeru de Turismu de la Xunta de Galicia, Alfonso Rueda, y el conseyeru de Turismu del País Vascu, Javier Hurtado, amás del director xeneral de Turespaña, Miguel Ángel Sanz, y la viceconseyera de Turismu del Principáu, Graciela Blanco.
Berta Piñán destacó que les cuatro comunidaes de la España Verde muévense nun contestu turísticu ‘bien similar’, a pesar de que caúna d’elles tenga ‘una personalidá bien marcada y unes señes d’identidá innegables’. La conseyera añedió que la marca supo adaptase ‘a la evolución del sector dende un apueste pola modernización y ensin perder de vista la esencia de la ufierta’.
Los últimos datos estadísticos sobre la España Verde ponen de manifiestu unes cifres de viaxeros, estancies y tases d’ocupación bien positives y, en gran parte de los casos, percima de la media nacional nes cuatro comunidaes.