El Principáu anima a les empreses emerxentes a buscar soluciones pa los retos tecnolóxicos de diez grandes compañíes

  • El plazu pa participar nel programa Ances Open Innovation, que busca startups en tol país, va tar abiertu hasta’l 18 de marzu
  • Les firmes innovadores que resulten ganadores van tener la posibilidá de desenvolver un proyectu coles líderes

El Gobiernu d’Asturies convida a toles empreses emerxentes de la comunidá a participar na quinta edición del proyectu Ances Open Innovation, un programa ambiciosu d’innovación nacional pol qu’once grandes compañíes busquen startups pa resolver los sos retos tecnolóxicos.

El plazu pa presentar propuestes a los retos de les firmes tractores va permanecer abiertu hasta’l 18 de marzu y les inscripciones puen formalizase na web https://ancesopeninnovation.com/

 Aceites Maeva, BSH Electrodomésticos, Cantabria Labs, Capital Energy, GSP Grup de Sanejament Porcí, Indertec Simetría, Mapfre, Mundiplan, PC Componentes y Soltec Innovations son les compañíes tractores, toes elles referentes nos sos ámbitos, que dende güei tán a la espera de candidatures. Tres d’un procesu de selección, van escoyer les ganadores nun actu que se va facer el 19 de mayu en Madrid.

Capital Energy Quantum ye la empresa propuesta dende’l Centru Européu d’Empreses y Innovación (CEEI) Asturies al programa. La compañía llanza un retu que se basa n’incorporar soluciones tecnolóxiques y de dixitalización aplicaes a la industria 4.0, operación y caltenimientu d’enerxía eólico y sector fotovoltaicu.

Esta compañía, nacida va dos décades coles mires de convertise nel primer operador 100 % anovable verticalmente integráu de la península ibérica, ta comprometida firmemente con Asturies, onde sofita’l texíu entamador al traviés de la so participación na IV edición del Programa Open Innovation 4.0, y dispon d’una trentena de proyectos eólicos, que’l primeru d’ellos, Busecu (50 MW), ta a puntu de ponese en marcha.

Caúna de les empreses innovadores nueves que’l so retu resulte ganador va recibir un premiu de 500 euros y la posibilidá de caltener la rellación cola firma tractora.

Coordinación del Centru Européu d’Empreses y Innovación

Open Ances Innovation consolidóse coles sos cuatro ediciones como un programa de referencia n’innovación abierta n’España. “Hasta’l momentu, más de 40 tractores presentaron yá 400 retos. Estableciéronse rellaciones perinteresantes ente empreses consolidaes y startups que son auténticos casos d’éxitu”, afirma Cristina Fanjul, coordinadora del programa, vicepresidenta d’Ances y directora del Centru Européu d’Empreses y Innovación (CEEI) d’Asturies.

El CEEI ye’l preséu principal del Gobiernu d’Asturies pa sofitar l’emprendimientu innovador. El centru acompaña a empreses nueves nel so procesu de medría y favorez contactos ente elles y axentes esternos o compañíes tractores. Un exemplu d’esta fórmula de trabayu son los programes rexonales Open Innovation 4.0, que se desenvuelven baxo la coordinación del Institutu de Desenvolvimientu Económicu del Principáu (Idepa) y que recibieron premios nacionales y internacionales. La esperiencia con estes iniciatives resultó clave pa impulsar el proyectu Ances Open Innovation.

Deja una respuesta

Tu dirección de correo electrónico no será publicada.

doce + cinco =