- L’Executivu ellaboró o actualizó nel últimu añu 31 documentos d’esti tipu, qu’informen a la ciudadanía sobre los sos derechos y les competencies de cada órganu alministrativu
El Gobiernu d’Asturies impulsa la ellaboración de cartes de serviciu en tolos órganos alministrativos como muestra de compromisu coles polítiques de tresparencia y rindición de cuentes na xestión pública. Nel últimu añu ellaboráronse o actualizaron 31 de les 41 cartes vixentes nel Principáu dende 2015, añu nel que s’empezó a trabayar con estos documentos.
Les cartes de servicios son certificaos nos que cada órganu o unidá informa a la ciudadanía sobre los servicios qu’empresta, los compromisos de calidá qu’asume y los derechos de los usuarios. Asina, apurren información sobre les actividaes de la organización y sirven de preséu de meyora de la calidá de los servicios públicos.
Tamién faen efectivos los principios de tresparencia, basaos nel postuláu de que la información que remanen les alministraciones ye un activu de participación que tien de tar disponible. Amás, la ciudadanía tien que poder encaminar la so conocencia y opinión hacia la eficiencia de la xestión pública.
Esta documentación tamién da cuenta de la misión, localización, horariu y datos de contactu de los distintos departamentos y árees, lo mesmo que de la normativa a la que tán suxetos, los servicios qu’empresten, los compromisos de calidá y los indicadores pa midilos. D’esta forma, la ciudadanía puede conocer a quién dirixise, ónde y de qué manera. El grau de cumplimientu d’estes mires mide tolos años y garantízase el so espardimientu públicu.
El director xeneral de Gobernanza Pública, Tresparencia, Participación Ciudadana y Axenda 2030, José Antonio Garmón, sorrayó que les cartes de serviciu permiten garantizar la calidá de los servicios públicos y midir el grau de cumplimientu de los compromisos adquiríos cola ciudadanía. “Ye xuna bona noticia que dende l’Alministración cada vez más árees vaigan sumándose a una política de tresparencia y de rindición de cuentes que facilita la meyora de la xestión pública”, indicó.
Dalgunes de les cartes de servicios disponibles anguaño son les d’Atención a la Ciudadanía, Serviciu d’Empléu, Recursos Humanos, Industria, Institutu Asturianu de la Muyer, Ente Públicu de Servicios Tributarios, Calidá del Aire, Atención a la Dependencia, Serviciu de Telecomunicaciones, Ordenación Académica y Evaluación Educativa.