El númberu d’empreses asturianes qu’esporten de manera regular marca un récord históricu, con 629 nel últimu añu

  • Les ventes de los principales productos xube un 41,6% y destaca l’aumentu correspondiente a los barcos, qu’algama un 105%.
  • Les esportaciones sumaron un valor de 5.187 millones, un 7,5% más que la mayor cantidá de la serie histórica.
  • Francia, Italia y Alemaña encabecen los principales mercaos del Principáu, que tamién aumenta les transacciones con México, Polonia y Turquía.

El númberu d’empreses asturianes qu’esporten de manera regular marcó un récord históricu l’añu pasáu: 629, 21 más que l’exerciciu anterior y 37 percima de 2019, antes de la pandemia del coronavirus.

Mientres 2021 tamién aumentaron les compañíes que realizaron dalguna venta nel esterior: 3.012 frente a les 2.140 del exerciciu precedente, lo qu’implica una medra del 40,7%. Sicasí, el datu cualitativu más relevante ye’l de les esportadores habituales, que fai referencia a les empreses que nos postreros cuatro años consecutivos vendieron bienes o servicios al esterior.

Estos datos enmárquense nos resultaos de la balanza esterior d’Asturies en 2021, añu nel que se superaron per vez primera los 5.000 millones n’esportaciones. En concreto, algamáronse los 5.187,1, un 7,5% más que la meyor cifra rexistrada hasta entós en tola serie histórica (4.823,6 millones en 2019).

Tocantes a les principales partíes esportadores, el cinc y les sos manufactures siguen siendo los productos más vendíos poles empreses asturianes al esterior y xuben un 29,6% respectu al añu anterior.

Tamién s’aumenten les esportaciones de los diez primeros productos, con un aumentu del 41,6%. Destaquen especialmente les xubíes de los artículos de fundición, fierro y aceru (41,6%) y la de barcos y embarcaciones, que se dobló (105,2%).

Estos diez primeros productos esportaos poles empreses asturianes son los siguientes: cinc y les sos manufactures (1.076,8 millones), fundición, fierro y aceru (1.067,6 millones); manufactures de fundición de fierro y aceru (565,9 millones), barcos y embarcaciones (243,6 millones), máquines y aparatos eléctricos (234,8 millones), pasta de madera y papel recicláu (217,6 millones), minerales escories y cenices (190,6 millones), productos químicos orgánicos (141,7 millones), lleche, productos lácteos y güevos (134,4 millones) y aluminiu y les sos manufactures (129,5 millones).

Ente los socios comerciales de les empreses asturianes, Francia, Italia y Alemaña siguen encabezando los destinos de les esportaciones rexonales. Caltiense la xubida nos 10 primeros países, con un aumentu de los intercambios del 58,6%.

Ente los diez países que merquen más productos y servicios rexonales figuren México, con una medra del 188,8% al respective de 2020; Polonia (137,4%) y Turquía (75,3%).

Los diez principales socios comerciales d’Asturies son los siguientes, por orde d’importancia: Francia, Italia, Alemaña, Turquía, Portugal, Países Baxos, Bélxica, Reinu Uníu, México y Polonia. A ellos esportáronse 3.605,1 millones l’añu pasáu.

Europa sigue concentrando la mayor parte de les esportaciones con un 71,9% de les ventes. En concreto, los países de la UE sumaron en 2021 un volume de 3.083,2 millones en compres a empreses rexonales, un 47,4% más que l’añu precedente.

Al combinar productu y destín de les esportaciones, compruébase qu’el cinc y les sos manufactures espórtense sobremanera a Turquía, Alemaña y Países Baxos, ente que productos de fundición de fierro y aceru véndense a Italia, Portugal y Turquía. México sigue ente los diez primeros socios comerciales d’Asturies debío fundamentalmente a la partida de barcos y embarcaciones.

Deja una respuesta

Tu dirección de correo electrónico no será publicada.

dieciseis − cuatro =