La Sociedá Rexonal de Promoción aprueba inversiones pa cinco proyectos anovadores con cargu al nuevu Fondu Asturies Startup

A continuación: nota de prensa Gobiernu d’Asturies:

La Sociedá Rexonal de Promoción (SRP), empresa pública del Principáu, aprobó no que va d’añu inversiones por valor de 325.000 euros pa los primeros cinco proyectos altamente anovadores, con cargu al nuevu Fondu Asturies Startup.

Esta ferramienta, dotada con 4,5 millones, ye un instrumentu financieru de sofitu a les nueves empreses anovadores y naz coles mires de fomentar l’espíritu entamador y promover la creación, afitamientu y crecedera d’esti tipu d’iniciatives.

Les dos convocatories, de primavera y seronda del 2021, recibióles con gran interés la comunidá entamadora, que presentó 44 solicitúes. Tres el procesu d’análisis y estudiu de financiamientu, aprobáronse cinco proyectos: CineLenses, HolaPlace, i4life, Plexigrid y Sponsorit, que yá captaron inversión privada y cunten con importantes reconocencies. Toos ellos representen una gran diversidá de modelos de negociu y sectores d’actividá: audiovisual, ociu, salú, enerxía y marketing dixital.

CineLenses ye la mayor base de datos de lentes de cine del mundu y aúna na so plataforma un marketplace d’usu profesional y otres funcionalidadesr, sosteníes con Intelixencia Artificial y big data. Tres casi cinco años de desenvolvimientu y evolución, nos que formó parte de l’Aceleradora d’Empreses Lanzadera, CineLenses consolídase como una referencia pal profesional audiovisual.

HolaPlace (Atiko Venues) ye’l portal líder del país n’arriendu de terraces y espacios pa eventos; cunta con más de 600 espacios únicos nes principales ciudaes y prepárense pa ser el marketplace pa entamar los eventos de mayor dimensión d’Europa, ufiertando tolos servicios y espacios con tan solo un clic. El financiamientu de la SRP favorez la so instalación n’Asturies dende los sos empiezos en Barcelona.

I4life diseña y fabrica dispositivos y software pa siguimientu remotu de pacientes crónicos y con comorbilidades. Pauto®, el so principal productu, ye un bastón xeolocalizáu qu’ayuda a salir de situaciones de conxelación de la marcha y d’emerxencia. i4life tien dos sellos d’escelencia de la Comisión Europea por dos proyectu d’anovación y foi ganadora n’Europa del III Premiu d’Anovación Social de la Fundación Mapfre.

Plexigrid ye una empresa dedicada a ufiertar soluciones pa sistemes eléctricos destinaes a dexar una xestión más eficiente y en tiempu real de los recursos instalaos nes redes eléctriques, mesmo que la optimización de manera individual o agregada de recursos flexibles del tipu paneles solares o vehículos eléctricos.

Sponsorit ta especializada nel desenvolvimientu y comercialización de soluciones tecnolóxiques de marketing dixital que dexen la venta d’espacios publicitarios conectando marques que busquen incrementar el so retornu con streamers. Anguaño foi la ganadora del Premiu Venture on the Road a la meyor Startup d’España, promovíu por Sabadell BStartup, SeedRocket y Wayra.

Fondo Asturies Startup

El Fondu Asturies Startup contempla’l financiamientu d’empreses emerxentes (startups) asturianes o que quieran establecese n’Asturies, tanto en fases iniciales como d’afitamientu y crecedera. El sofitu financieru articúlase al traviés de préstamos participativos dende 50.000 a 200.000 euros y presenta grandes ventayes al respective d’otru tipu de financiamientu, yá que nun s’esixen garantíes, los plazos puen llegar hasta los 7 años, nun lleven comisiones y les amortizaciones adáptanse a la evolución de la empresa.

El fondu ye xestionáu pola SRP en collaboración col Centru Européu d’Empreses y Innovación (CEEI Asturies), que facilita asesoramientu a los promotores pal diseñu del plan de negociu y mentorización del proyectu. Amás, cunta col sofitu d’un comité asesor compuestu por espertos de reconocíu prestixu nos ámbitos empresarial, inversor, d’innovación y de tecnoloxía.

La SRP xestiona anguaño 52 millones invertíos en 48 empreses pertenecientes a una gran variedá de sectores: tecnolóxicu, industrial, agroalimentariu, salú y ciencies de la vida, inxeniería, socio-asistencial, economía circular y sostenibilidá o moda.

Más información: https://www.srp.es/empresas/emprendedores/

Deja una respuesta

Tu dirección de correo electrónico no será publicada.

1 × uno =