- L’Executivu va sofitar la creación d’un club de productu que vertebre la ufierta pa captar eventos y viaxes corporativos
- La viceconseyera Graciela Blanco presenta’l plan d’allugamientu de turismu MICE, que cuntó cola collaboración de más de 30 axentes públicos y privaos
- El documentu busca xenerar riqueza y empléu estable en temporada baxa
El Gobiernu d’Asturies va crear una marca única qu’identifique a la comunidá como referente del turismu de negocios, nel marcu del plan d’allugamientu como destín de turismu MICE, calificáu asina poles sos sigles n’inglés (Meetings, Incentives, Conferencing y Exhibitions), qu’incluye los viaxes d’eventos, feries, congresos, incentivos y toa actividá que suponga movese con fines profesionales.
La viceconseyera de Turismu, Graciela Blanco, que presentó güei esti documentu, esplicó que’l so oxetivu ye «llograr que’l segmentu MICE se refuerce como un motor sostenible d’actividá económica, de riqueza y d’empléu estable». El plan busca qu’Asturies se vincule cola idea d’un destín d’eventos d’escala humana, seguru, sostenible, profesional y competitivu na rellación calidá-preciu. Pa ello, va poner en valor les sos sedes singulares, tanto n’ámbitu urbanu como nel rural, y va aprovechar la coxuntura favorable en materia de conexones.
Tien seis llinies d’actuación:
- Branding o xeneración d’imaxe de marca: va avanzar escontra la creación d’una marca única qu’identifique Asturies como destín bleisure (d’ociu y negociu).
- Renovación de les canales de comunicación por mediu de la creación d’una web específica, l’apertura de perfiles en redes sociales y un sistema d’unviu de comunicaciónes (newsletters).
- Accciones col sector profesional, ente les que destaquen les enfocaes a la collaboración con axencies, asociaciones y agrupaciones de la Organización Profesional de Congresos de calter nacional, y les empobinaes al segmentu corporativu, cola organización de seminarios web y presentaciones virtuales d’Asturies a empreses asociaes y veceros, el patrociniu d’eventos o la organización de viaxes de familiarización.
- Acciones comerciales y de promoción: asistencia a feries y eventos como IBTM World (Barcelona) o Iberian MICE Forum, cita esta postrera que se va celebrar en xunu en Xixón.
- Campañes de publicidá.
- Sofitu al sector MICE asturianu col impulsu d’un club de productu profesional, d’algame autonómicu y de sofitu a la captación de grandes eventos, ente más otros.
La estratexa va dir dirixida a les grandes ciudaes, atendiendo a la so conectividá col Principáu. «Vamos dirixinos a Barcelona, Valencia, Sevillla y Bilbao, pero sobre manera a Madrid, mercáu que se va ver impulsáu gracies a la puesta en funcionamientu de l’alta velocidá ferroviaria», precisó Blanco.
La ellaboración del documentu técnicu tuvo en cuenta les aportaciones de más de 30 axentes públicos y privaos vinculaos col sector. «Quixímos construyir un plan compartíu, por eso recoyimos el criteriu del sector profesional y de los sos representantes, al que tamién s’incorporaron los encamientos de la demanda pa construyir un instrumentu que ye debedor de dambes visiones», añedió la viceconseyera.
Una ufierta competitiva
Les trés principales ciudaes asturianes cunten con una ufierta global cercana a la 50.000 places en sales de xuntes, gran parte n’equipamientos de gran singularidá como’l palaciu d’esposiciones y congresos Ciudá d’Uviéu, l’auditoriu Príncipe Felipe, Llaboral Ciudá de la Cultura, el recintu ferial Luis Adaro y el palaciu de congresos, en Xixón, o’l Centru Niemeyer d’Avilés.
A esta realidá urbana súmase la ventaya de cuntar con más de 20 sedes de calter singular y temáticu n’ámbitu rural, lo que construye una ufierta bien comunicada que dexa’l pasu de lo urbano al altu monte en menos d’una hora de viaxe y ufierta numberoses esperiencies complementaries vinculaes cola naturaleza, la cultura y la gastronomía asturianes, fuertemente asociaes al territoriu.
Según el Sistema d’Información Turística, 449.922 turistes visitaron Asturies por motivos de trabayu o p’acudir a congresos y feries nel 2019, últimu añu con actividá normalizada nesti segmentu enantes de la pandemia.
Blanco presentó esti plan mientres la xornada celebrada con cuenta del Día Mundial de la Industria del Turismu de Reuniones, entamada a comuña por Uviéu Congresos, el Club d’Empreses de Turismu de Negocios del Principáu d’Asturies, y Avilés Club d’Empreses.