El Gobiernu d’ Asturies incentiva la innovación empresarial con 6,8 millones pa desarrollar 110 proyectos

  • Un centenar d’empreses van beneficiase de la última convocatoria d’ayudes a la I+D+i de la Conseyería de Ciencia.
  • Les propuestes inclúin meyores n’agroalimentación, intelixencia artificial, plataformes dixitales, tecnoloxía aplicada a la salú y acciones de sostenibilidá.
  • Nos trés últimos años aprobáronse 342 propuestes y movilizáronse más de 51 millones.

Un centenar d’empreses van beneficiase de les ayudes del Gobiernu d’Asturies pa impulsar la I+D+i. La Conseyería de Ciencia, Innovación y Universidá financia con 6,8 millones, al traviés del Institutu de Desenvolvimientu Económicu del Principáu d’Asturies (Idepa), 110 proyectos que van ameyorar la competitividá empresarial por aciu el desenvolvimientu de nueves tecnoloxíes y productos. Les actuaciones van movilizar una inversión total de 28 millones en dos años namás.

La última convocatoria d’ayudes a la I+D+i empresarial, que la so resolvimientu se va publicar nos próximos díes nel Boletín Oficial del Principáu d’Asturies (Bopa), confirma’l creciente interés de les empreses asturianes pola innovación, especialmente ente les pymes. Son 99 les compañíes que van recibir subvenciones, n’ocasiones superiores a los 100.000 euros, pa poner en marcha actuaciones innovadores.

Les iniciatives son bien diverses, magar se centren sobremanera en desenvolvimientu de plataformes tecnolóxiques, intelixencia artificial, big data, impresión aditiva y nueves tecnoloxíes aplicaes a la medicina, salú y avieyamientu.

Dalgunos de los proyectos aprobaos son:

  • Sector de la agroalimentación: L’usu de tecnoloxía 4.0 pa midir el rendimientu d’un plantíu de quivis, l’estudiu de nuevos procesos pal tratamientu de productos sensibles a la oxidación nel ámbitu de la industria láctea, la investigación en plagues en cultivos rexonales, l’estudiu de la oxidación de la calidá de la cerveza, o’l envasáu intelixente nel sector del café, son dalgunes de les propuestes de meyora nel ámbitu de la agroalimentación.
  • Nueves tecnoloxíes. Son munchos los proyectos qu’inclúin plataformes tecnolóxiques pal sector inmobiliariu, el tresporte o la xestión de plantes eléctriques, y tamién intelixencia artificial ya impresión aditiva aplicada a distintos campos. Destaquen, por casu, un proyectu pa la detección automática de cambeos nel territoriu a partir de series temporales d’imáxeness aérees o una propuesta d’intelixencia artificial aplicada a la bioimpresión de cultivos oncolóxicos.
  • Sostenibilidá. Les empreses trabayen nel usu de microalgues pa la eliminación de sales n’agües residuales, monitorización en tiempu real de la calidá del aire en función de les condiciones de tráficu, nuevos modelos de producción p’amenorgar l’impactu ambiental en cementos, sensores pa siguir l’estáu ecolóxicu de los ríos, lluminaries avanzaes pa túneles de carretera, desenvolvimientu del vehículu eléctricu o tratamientu de biorresiduos de la industria láctea.
  • Salú. Les propuestes muévense alredor a la innovación tecnolóxica d’impresión 3D aplicada a la medicina, lluminaries led pa caltener la salú ocular, estudiu metagenómicu de la población sénior sobre los factores qu’inflúin na llonxevidá, desenvolvimientu de nuevos alimentos que favorezan l’avieyamientu saludable, nuevos dispositivos farmacolóxicos o desinfección de patóxenos con lluz ultravioleta.
  • Industria y fabricación. Nun falten propuestes pa fabricar n’impresión aditiva mázcaros personalizaos a partir de cares digitalizaes, proyectos venceyaos al hidróxenu verde, procesos qu’ameyoren la eficiencia de la producción, sistemes de detección d’averíes n’ascensores, o empléu d’intelixencia artificial nel desenvolvimientu de maquinaria.

La convocatoria d’ayudes recueye tamién un programa pilotu venceyáu al hub de circularidá, qu’inclúi investigaciones sobre l’esguiláu de procesos de valorización, material y enerxética, de subproductos industriales. Nesti campu, aprobáronse siete proyectos con una inversión de 666.000 euros.

L’interés de les empreses asturianes pola innovación creció nos últimos años. Ente 2019 y 2021, el Principáu atendió 342 solicitúes d’empreses y destináronse 19 millones a financiar estes iniciatives. Consiguiéronse inversiones per valor de 51,4 millones; esto ye, cada euru públicu xeneró una inversión de 2,7 euros privaos.

Los proyectos financiaos enmárquense na Estratexa d’Especialización Intelixente (antigua RIS3) y tienen por oxetivu fomentar les sinerxes ente empreses y centros d’investigación. Nesti sentíu, 69 de los proyectos aprobaos van ser mistos, esto ye, van realizase ente empreses ya investigadores.

Deja una respuesta

Tu dirección de correo electrónico no será publicada.

trece − 10 =