El Centru Européu d’ Empresas ya Innovación impulsa una ventena de proyectos lligados a la industria del sector creativu y cultural

A continuación: nota de prensa Gobiernu d’Asturies:

El Centru Européu d’Empreses ya Innovación (CEEI) asesoró ya impulsó la puesta en marcha d’una ventena de proyectos lligaos al sector creativu y cultural asturianu. Dos compañíes del ámbitu del entretenimientu y de la moda llograron güei el premiu Creative Business Lab, nel Demo Day, la xornada de presentación d’eses propuestes.

El conseyeru de Ciencia, Innovación y Universidá, Borja Sánchez, participó na inauguración del alcuentru y animó a los entamadores a trabayar pa comercializar los sos productos ya idees.

Na mesma llinia, la directora del CEEI, Cristina Fanjul, valoró esti programa, que nació como una iniciativa pilotu d’aceleración d’idees empobinada a profesionales del sector creativu y cultural, y como mediu pal acercamientu de la comunidá artística asturiana al mundu del emprendimientu y la empresa. El resultáu superó les mires iniciales, cola participación de 18 proyectos empresariales.

Doce d’eses propuestes presentáronse esta mañana nun actu nel CEEI, nel que tamién se fixo entrega del premiu al meyor proyectu, dotáu con 1.500 euros. El xuráu decidió que compartan el gallardón les empreses Principality, dedicada al entretenimientu y l’ociu, y RingoRango, una marca de moda y complementos inspiraos na cultura tradicional asturiana.

A lo llargo de seis meses, el CEEI trabayó n’asesorar y sofitar el desenvolvimientu d’estes empreses del ámbitu cultural y de distintos signos, dende propuestes venceyaes al ámbitu audiovisual, diseñu y moda, nueves tecnoloxíes, danza ya inclusive formación online.