El Serviciu de Consumu de l’Axencia de Seguridá Alimentaria, Sanidá Ambiental y Consumu encamienta realizar durante la temporada de rebaxes una compra responsable, ensin cayer n’alquisiciones compulsives de productos que nun se precisen. Por ello, aconseyan ellaborar una llista colo que realmente se precise y afaese al presupuestu previstu.
Los productos adquiríos durante esti periodu de descuentu tienen d’especificar na etiqueta’l preciu anterior y el rebaxáu. Amás, han d’incluyir una garantía llegal, igual que cualquier artículu nuevu mercáu n’otru momentu. Nel caso que’l productu nun precise’l períodu de garantía llegal, ésta va algamar trés años.
El Serviciu de Consumu, dependiente de la Conseyería de Salú encamienta tamién afitase en rebaxar aplicada, una y bones dellos productos presenten descuentos pocu significativos y pueden atopase n’otres promociones a lo llargo del añu.
Tamién suxuren nun faer un usu abusivu de les tarxetes de creitu para evitar sorpreses y poder faer frente a los pagos los meses siguientes. Si l’establecimientu almite’l pagu con tarxeta, nun va poder aplicar nengún tipu de recargu pol so usu durante la rebaxa.
Los establecimientos qu’anuncien rebaxes tendrán de tener siquier la metá de los sos artículos con descuentos. Estos productos nun pueden tar deterioraos o defectuosos, nin tampoco ser fabricaos especialmente para esti períodu, polo que van tener que tar primeramente a la vienta nel establecimientu.
Los artículos con descuentos tendrán de tar claramente identificaos y bien estremaos y van poder coesistir con otros productos ensin rebaxar o con otres vientes promocionales (ufiertes, saldos…)
Una vegada efectuada la compra ye importante esixir y guardar el ticket o factura, al ser imprescindibles para cualquier reclamación o para faer efectiva la garantía nel casu de que’l productu presente dalgún defectu.
Nun esiste obligación llegal de devolver el dineru o camudar l’artículu mercáu, sacantes sía defectuosu. Por esta razón, ye conveniente consultar la política de devoluciones de cada establecimientu, según los plazos, les condiciones y si devuélvese’l dineru o se da un vale canjeable.
Precuros énte’l comerciu electrónicu
El comerciu electrónicu consolidase nos vezos de consumu y añu tres d’añu esperimenta una notable crecedera, polo que convien tener en cuenta qu’estes compres faen al usuariu más vulnerable énte posibles engaños o estafes. Nesti sentíu, Consumu encamienta verificar les condiciones de seguridá de la páxina y comprobar que la barra de direcciones empieza por https://, cola “s” de seguridá, o que tien el símbolu del candáu o llave.
Amás, ye importante resabiar d’ufiertes a precios bien rebaxaos y consultar les opiniones d’otros usuarios sobro’l vendedor. Al realizar una compra por Internet disponese de 14 díes pa devolver lo mercao ensin sufrir nenguna penalización.
Reclamación de derechos
En casu de tener un problema, tien d’intentase solucionalo amistosamente col establecimientu. De nun poder llegar a una solución satisfactoria, puede solicitase la fueya de reclamaciones, que l’establecimientu tien la obligación de facilitar, y allegar a cualquier Oficina d’Información al Consumidor (OMIC) o al Serviciu de Consumu de l’Axencia de Seguridá Alimentaria, Sanidá Ambiental y Consumu p’asesorase y presentar la correspondiente reclamación.
El Serviciu de Consumu recuerda que mercar nos establecimientos xuntaos al Sistema Arbitral de Consumu garantiza xuna solución amistosa, rápida y gratuita de les potenciales reclamaciones.