- La desocupación cai un 36,47 % ente los menores de 25 años, el colectivu con meyor evolución nel exerciciu últimu.
- Les afiliaciones a la Seguridá Social xuben a 370.199, el meyor datu p’avientu dende’l 2010.
- El paru rexistráu menguó a 64.798 persones, el númberu más baxu p’acabar l’añu dende’l 2008.
- Les contrataciones marquen un récord con 302.643, 30.000 d’elles indefiníes.
Asturies cerró 2021 con descensos del paru rexistráu y medríes del empléu. Según los datos publicaos esta mañana, el desempléu baxó en 17.272 persones (21,05 %) nos doce meses y la ocupación establezse en 370.199 afiliaos a la Seguridá Social en sumando 9.751 cotizantes (2,71 %).
Dambos indicadores confirmen la recuperación de la economía asturiana y del empléu. Nel casu del desempléu, el númberu de persones desocuapaes asitia en 64.798, el meyor datu pa un mes d’avientu dende’l 2008. Asina mesmo, l’afiliación a la Seguridá Social (o persones ocupaes) ye superior a les cifres rexistraes n’avientu del 2019, lo que supón qu’Asturies recuperó l’empléu perdíu desque empezó la pandemia.
Nel 2021, en términos interanuales el desempléu baxó en dambos sexos, en tolos grupos d’edá y en tolos sectores d’actividá. Destaca sobre manera la cayida del 36,47 % ente los menores de 25 años, un colectivu d’atención prioritaria pal Gobiernu d’Asturies, lo que supón 2.347 desocupaos menos. Nesti tramu d’edá’l paru baxó quince puntos percima de la media rexonal.
Por sectores, la construcción y la industria confírmense como sectores tractores con baxaes del desempléu del 22,08 y del 24,76 % nos doce meses últimos, mentes que’l colectivu ensin trabayu anterior rexistra una cayida de 2.194 paraos menos (26,22 %).
En términos absolutos, sicasí, el sector servicios lideró les baxaes, con 11.702 paraos menos nel últimu añu, un 19,85 % menos al respective del 2020.
Tocante a la evolución del paru rexistráu nel últimu mes del añu, rexistróse un descensu en 1.605 persones (2,42 %) al respective de payares y la creación de 1.563 empleos. Destaca sobre manera la baxada del paru femenín (1.465 paraes menos) y ente los mozos menores de 25 años, con un retrocesu del 9,85 %.
La recuperación del empléu y de l’actividá económica tuvo’l so reflexu nos niveles de contratación. Asina, l’añu pasáu’l Serviciu Públicu d’Empléu del Principáu d’Asturies (Sepepa) contabilizó 302.643 contratos, lo que supón 56.419 contratos más (un aumentu del 23 %). D’estos, 29.123, el 9,62 %, fueron indefiníos.
Esti enclín tuvo’l so reflexu na evolución de los trabayadores regulaos d’empléu, qu’a finales d’añu estableciéronse en 1.480 persones nel casu d’espedientes covid y en 678 nel casu de procedimientos ensin rellacionar cola pandemia sanitaria.
Pilar Varela, directora xerente del Serviciu Públicu d’Empléu (Sepepa) afirmó que mientres anguaño’l Gobiernu d’Asturies va potenciar los programes y iniciatives en polítiques actives d’empléu pa contribuyir a afitar la recuperación del empléu y acompañar a los colectivos y persones con más dificultaes d’inserción llaboral. Nel 2022 estes polítiques van cuntar con más de 123 millones cola incorporación de nueves midíes financiaes colos fondos europeos del Mecanismu de Recuperación y Resiliencia (MRR).