- El Principáu va disponer de 13,2 millones pa facilitar l’arrendamientu per parte de xóvenes y de 47,6 pa favorecer l’accesu a un pisu de la población con menos recursos
- La conseyera Melania Álvarez participó güei na xunta telemática de la conferencia sectorial presidida pola ministra Raquel Sánchez
Asturies va recibir 60.819.000 euros procedentes de los fondos del Plan Estatal pa l’Accesu a la Vivienda 2022-2025 y pal bonu arriendu nuevu. D’esta cifra, 13,2 millones van dir empobinaos a facilitar l’arrendamientu per parte de la población xoven y 47,6 van destinase a favorecer l’accesu a un pisu de los sectores de la población con menos recursos.
Esta repartida foi ratificáu güei na xunta telemática de la Conferencia Sectorial de Vivienda y Suelu, presidida pola ministra de Tresportes, Raquel Sánchez, y na que participó la conseyera de Derechos Sociales y Bienestar, Melania Álvarez. Primeramente, el 2 de febreru, el ministeriu y les comunidaes suscribieron un preacuerdu sobre la distribución territorial de los 1.843 millones n’ayudes financieres con que se dotaron dambos programes.
El bonu xoven al arriendu prevé una ayuda de 250 euros mensuales pa dos años pa persones de 18 a 35 años. Pa beneficiase d’esta subvención, los solicitantes han cuntar con un contratu d’arriendu y otru de trabayu que nun implique una renta superior a trés veces l’Indicador Públicu de Renta d’Efectos Múltiples (Iprem), lo que supón unos ingresos añales de 24.318,84 euros.
Amás, el llímite del preciu del arriendu va ser de 600 euros, nel casu de los pisos, y de 300 p’habitaciones.
Polo que se refier Plan Estatal pal Accesu a la Vivienda 2022-2025, dalgunos de los sos oxetivos al curtiu plazu n’Asturies son los siguientes:
- Facilitar l’accesu a la vivienda d’arriendu a les persones con menos recursos por aciu ayudes directes.
- Favorecer l’accesu a la vivienda o a soluciones habitacionales lo más inmediates posibles a víctimes de violencia, persones ensin llar y aquelles especialmente vulnerables.
- Collaborar colos oxetivos del retu demográficu por aciu ayudes a xóvenes pa l’alquisición de vivienda habitual y permanente en conceyos o localidaes con menos de 10.000 habitantes.
Como propósitos al mediu plazu destaquen los siguientes:
- Incrementar la ufierta de vivienda n’arriendu algamadizu pa persones mayores o con discapacidá, por aciu ayudes a la promoción d’edificaciones con diseñu, instalaciones y servicios que respuendan a les sos especiales circunstancies.
- Facilitar la rehabilitación y accesibilidá de les viviendes de propietarios privaos, por aciu ayudes pa la instalaciones d’ascensores o la reforma interior, col fin d’adaptales a les persones con movilidá amenorgada.