• 29 de marzo de 2024 17:46

Asturies va convertise nun observatoriu de la biodiversidá contra’l cambéu climáticu en collaboración con cinco autonomíes

  • El Principáu va destinar dos millones, la metá procedente de fondos europeos, pa evaluar y apangar l’impactu de l’actividá humana nel entornu natural.
  • La Conseyería de Ciencia lidera la propuesta, que va ser desenvuelta pol IMIB col sofitu del Institutu Oceanográficu de Xixón.

Asturies va convertise nun observatoriu de la biodiversidá pa apurrir soluciones que permitan apangar el cambéu climáticu. El Principáu va destinar dos millones, la metá procedente de fondos del Mecanismu de Recuperación y Resiliencia, a monitorizar y realizar un siguimientu d’ecosistemes, poblaciones y comunidaes naturales, amás d’evaluar l’impactu de la crisis medioambiental na naturaleza.

El conseyeru de Ciencia, Innovación y Universidá, Borja Sánchez, suscribió esta mañana l’alcuerdu del Conseyu de Política Científica, Tecnolóxica y d’Innovación pa poner en marcha distintos planes complementarios venceyaos a los fondos europeos. Asturies participa xunto con otres cinco comunidaes (Estremadura, Galicia, Andalucía, Canaries y Baleares) nel programa denomináu Esploración, analís y prospectiva de la Biodiversidá: Posibles respuestes a la estratexa 2030 de Desenvolvimientu Sostenible nun escenariu de Cambéu Global.

El presupuestu del plan ye de 65 millones d’euros y tien un plazu máximu d’execución de trés años. Estremadura va asumir la coordinación del programa nos sos aspeutos científicu-técnicos y alministrativos y cada comunidá va participar en determinaes llinies. Estes son les que va desenvolver Asturies:

Monitorización y siguimientu de la biodiversidá por aciu tecnoloxíes terrestres y marines. Esta llinia pretende realizar un inventariu y estudiu de la biodiversidá dende’l terrén, y el siguimientu d’ecosistemes, poblaciones y comunidaes naturales. La información que se xenere va permitir envalorar cambeos na riqueza y distribución de la biodiversidá, que sirviría de base pa la política de caltenimientu en cada comunidá.

Inventariu de los servicios ecosistémicos, esto ye, aquellos beneficios qu’un ecosistema apurre a la sociedá y qu’ameyoren la salú, la economía y la calidá de vida de les persones. Asturies va realizar una valoración económica del capital natural y de les polítiques ambientales y de caltenimientu. Estos datos van sirvir de guía pa definir les fortaleces y debilidaes del sistema socioecolóxicu d’Asturies frente al cambéu global. Amás, van diseñase modelos de xestión sostenibles de recursos naturales y de sofitu científicu na valorización de los sectores turísticu y primariu.

​​​​​

Evaluación y mitigación del impactu del cambéu global sobre la biodiversidá. Trátase d’analizar la influencia del usu y ocupación del territoriu sobre la biodiversidá, evaluar l’impactu de les invasiones biolóxiques y el so control, y analizar la resiliencia frente al cambéu climáticu, ente otres acciones.

Nel casu d’Asturies va emprestase especial atención al impactu medioambiental que produció a lo llargo del tiempu’l desenvolvimientu industrial y urbanu, dende la contaminación del aire, del agua y de los suelos a la ocupación y tresformamientu del espaciu. L’oxetivu ye aplicar les nueves tecnoloxíes na evaluación de los impactos p’abrir nueves posibilidaes d’incrementar el valor del patrimoniu natural nes zones de mayor actividá industrial y de densidá de población, pa contribuyir a ameyorar la calidá de vida.

Esti programa va reforzar de forma significativa la investigación nel Campus de Mieres, yá que va ser impulsáu pola Conseyería de Ciencia, Innovación y Universidá y desenvueltu pol Institutu Mistu d’Investigación en Biodiversidá (IMIB). Esti centru, de titularidá compartida ente’l Gobiernu d’Asturies, Universidá d’Uviéu y Conseyu Superior d’Investigaciones Científiques (CSIC), ta especializáu nel estudiu de los efectos de los cambeos ambientales provocaos poles actividaes humanes. El IMIB va exercer la coordinación científica col sofitu de grupos d’investigación de la Universidá d’Uviéu y l’Institutu Oceanográficu de Xixón.

Deja una respuesta

Tu dirección de correo electrónico no será publicada. Los campos obligatorios están marcados con *

dos × uno =

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies