La Conseyería d’Industria, Empléu y Promoción Económica va destinar 6,5 millones nel periodu 2022-2025 a la promoción, impulsu y meyora de la competitividá de les cooperatives y sociedaes llaborales, según anunció güei el conseyeru, Enrique Fernández, mientres la presentación del Programa Estratéxicu de la Economía Social.
El titular d’Industria anunció esta inversión n’una xunta telemática del Conseyu Asturianu de la Economía Social (CAES), l’órganu colexáu asesor y consultivu para les actividaes rellacionaes col empléu colectivu nel Principáu.
La ellaboración del programa estratéxicu, frutu d’un trabayu colaborativo, ye unu de los compromisos del programa de llexislatura de la conseyería y escuerre impulsar el desenvolvimientu y l’afitamientu de la economía social, según el emprendimiento colectivu. Amás, pretende dar respuesta a les demandes y necesidaes del sector.
El documentu enceta, de manera integral y con visión estratéxica, la situación actual y les midíes de sofitu al sector, col fin de favorecer la so crecedera por aciu la ordenación de los preseos normativos y financieros, la revisión de les llínees d’ayudes y l’identificación de les prioridaes.
El programa estratéxicu, que les sos llínees xenerales desenvolvió na xunta del CAES el director xeneral de Comerciu, Emprendimiento y Economía Social, Julio González Zapico, articúlase en redol a seis grandes oxetivos y 19 midíes o acciones específiques. Los seis exes prioritaries son los siguientes:
- Sofitu al empléu y al emprendimiento por aciu acciones que favorezan la creación d'empreses y puestos de trabayu y qu'utilicen fórmules d'economía social.
- Impulsu al afitamientu de les empreses actuales para potenciar la so competitividá, ameyorar la so dimensión y facilitar la creación de nuevos empleos.
- Ameyorar la visibilidá del sector, dar a conocer los valores y opciones qu'ufierta y - contribuyir a la so reconocencia social.
- Incorporar la innovación social nesta actividá empresarial.
- Favorecer la participación activa de les entidaes representatives nel ámbitu institucional.
- Fomentar la inclusión social nel sector.Ente les 19 midíes incluyíes nel documentu, contémplase’l refuerzu de la capitalización de les empreses, la creación d’un fondu de capital grana empobináu a la economía social, l’apertura de llínees d’ayudes a la inversión, a l’ampliación de mercaos, al relevu xeneracional y a la creación de plataformes de comercialización, según el desenvolvimientu d’un plan de tresformamientu dixital pal sector.
Tamién se preve la firma d’un alcuerdu col Serviciu Públicu d’Empléu del Principáu (Sepepa) pa la definición d’un programa de formación específicu. Amás, el testu incorpora acciones d’espardimientu y sofitu específicu a los proyectos de emprendimiento nel mediu rural, de cuenta que se maximice l’aportación de la economía social énte’l retu demográficu.
El conseyeru d’Industria sorrayó que’l Gobiernu d’Asturies da respuesta con esti programa a una demanda del sector. “El documentu va contribuyir decisivamente a la so crecedera con midíes que van facilitar tanto la creación de nueves empreses como’l desenvolvimientu d’aquelles que, pola so implantación, tean plantegándose la espansión, la diversificación y l’accesu a nuevos mercaos”, destacó.
Al so xuiciu, el programa va facilitar a cooperatives y sociedaes llaborales les ferramientes estratéxiques pa convertise en protagonistes nel procesu de recuperación de la economía tres la crisis derivada de la pandemia, según na llucha contra la despoblación nel mediu rural. “Les midíes plantegaes surden como respuesta a una busca de soluciones pal sector realizada xuntu con representantes de les empreses, espertos de diverses adscripciones y axentes sociales. Por ello creemos que tienen el potencial abondu pa marcar un antes y un dempués na economía social asturiana”, señaló Fernández.
Radiografía del sector na comunidá
El sector de la economía social ta formáu n’Asturies por barganal de 600 empreses que xeneren casi 5.000 empleos directos. El 47,6% de les compañíes son sociedaes llaborales, abargana del 30% cooperatives de trabayu asociáu, un 19,7% cooperatives agroalimentarias y el 9,8% sociedaes agraries de tresformamientu. En xunto, representen el 6,4% del texíu empresarial del Principáu.
Estes sociedaes alcuéntrense fundamentalmente na zona centro de la comunidá, siguida pola contorna occidental y, en muncha menor midida, nel oriente y nes cuenques mineres.
El 63% de les empreses desenvuelve la so actividá nel sector servicios. Por ámbitos económicos, el primariu y l’industrial apurren, respectivamente, el 15,4% y el 13,5%, ente que la construcción participa col 8,1%.
La potencia del cooperativismu destaca especialmente nel sector agrariu y ganaderu, con 35 cooperatives agroalimentarias n’activu y abargana de 60 sociedaes agraries de tresformamientu.