- El desempléu baxa en 152 persones y asítiase en 66.037, el meyor datu pa esi mes dende’l 2008
- Anguaño hai 18.680 paraos menos que va un añu, lo que supón el segundu mayor descensu interanual de tola serie histórica
- La contratación indefinida caltién el so enclín positivu y marca un récord nuevu, con 6.238 empleos fixos
- Los trabayadores regulaos por ERTE baxen hasta 2.024, el mínimu desque empezó la crisis sanitaria
Asturies llogró reducir el desempléu y crear 1.152 puestos de trabayu nuevos en marzu a pesar del contestu económicu y la fuelga del tresporte. El númberu de persones paraes rexistraes nes oficines del Serviciu Públicu d’Empléu del Principáu (Sepepa) baxó en 152 al respective de febreru (0,23 %) y asítiase en 66.037, la menor cifra pa un mes de marzu dende’l 2008.
A pesar del aumentu xeneralizáu de los precios y del impactu de la invasión rusa d’Ucrania, agraváu nel Principáu pola fuelga del tresporte de mercancíes, el mes pasáu non solo baxó’l desempléu, sinón que tamién aumentó la contratación, concretamente un 0,31 %.
Al respective de marzu del 2021, producióse una baxada del paru del 22,05 %. Asina, anguaño hai 18.680 paraos menos que va un añu, lo que supón el segundu mayor descensu interanual de tola serie histórica. N’España, l’amenorgamientu foi del 21,29 %. El Principáu lleva yá 12 meses de descensu interanual siguíu.
Por sectores, destaca’l retrocesu interanual del desempléu na industria (23,40 %) y la construcción (22,20 %). Pela so parte, nel colectivu ensin empléu anterior producióse un amenorgamientu del 28,85 %, mentes qu’ente los menores de 25 años algamó’l 37,28 %.
La contratación caltién el bon enclín de los últimos meses, sobre manera la de calter indefiníu, pol efectu positivu de la reforma llaboral. Asina, en marzu soscribiéronse 23.817 contratos, lo que supón un aumentu del 12,68 % al respective de febreru. Del total, 6.238 fueron indefiníos (26,19 %), lo qu’implica una medría del 58,04 % sobre’l mes anterior. La contratación indefinida creció nel últimu añu un 125,28 %.
Gracies a esti aumentu nuevu de los contratos, l’afiliación a la Seguridá Social asitió nel 368.780 persones n’Asturies.
Tocantes a la evolución de los espedientes de regulación temporal d’empléu (ERTE), el númberu de trabayadores amparaos por esta ferramienta baxó en 335 persones, hasta un total de 2.024, la cifra más baxa desque empezó la pandemia sanitaria. En concreto, 629 emplegaos tienen nestos momentos dalgún procedimientu de flexibilidá.
La directora xerente del Serviciu Públicu d’Empléu (Sepepa), Pilar Varela, valoró güei los rexistros de marzu: «Estos datos reafítennos na importancia de xestionar tolos recursos recoyíos nel presupuestu y los alcuerdos de concertación con axentes económicos y sociales. Nel Sepepa vamos tramitar 139 millones en polítiques actives d’empléu pa que tolos actores implicaos collaboremos nel oxetivu de la incorporación llaboral de les persones paraes».