Un total de 265 proyectos opten a les ayudes al sector forestal, que sofiten la reforestación, la prevención de quemes y la silvicultura

  • Esta llinia de subvenciones del Gobiernu d’Asturies, dotada con 3,8 millones, empobínase a empreses y particulares 


El Gobiernu d’Asturies apuesta pola reforestación, la prevención de quemes y la silvicultura na convocatoria d’ayudes al sector forestal, empobinada a empreses y particulares, y dotada con 3,8 millones. A esta llinia de subvenciones, que va resolvese nes selmanes vinientes, presentáronse 265 proyectos.

Les ayudes, que tienen financiación de la Unión Europea (UE) al traviés del Fondu Europeu Agrariu de Desenvolvimientu Rural (Feader), favorecen los llabores de xestión forestal en montes particulares y la reforestación con autóctones y pinos, dientro d’unos parámetros d’ordenación sostenible. Tamién apoyen la ellaboración y desenvolvimientu de planes d’ordenación y xestión de montes vecinales, que suponen cuasi la cuarta parte de la propiedá forestal na comunidá.

Los proyectos de reforestación acaparen el 50 % de les ayudes y la cantidá destinada a xestión forestal y silvicultura foi medrando de manera progresiva, hasta algamar yá’l 20 %, porque la iniciativa privada implícase cada vez más en llabores de reforestación lligaes a l’absorción de CO2. Otru de los ámbitos con más pesu ye la prevención de quemes, al que se dedica el 10 % de los fondos.

Aparte d’estes ayudes, el Principáu destina más de 500.000 euros a subvenciones pa impulsar l’actividá forestal col sofitu a estos organismos y colectivos: 

  • Centru Tecnolóxicu Forestal y de la Madera (Cetemas): pa desenvolver proyectos de modernización del sector, potenciar la castañal y rentabilizar la buelga de CO2.
  • Asturforesta: pa entamar la feria más importante de la península.
  • Asociaciones de propietarios forestales: pal desenvolvimientu d’un plan especial d’eliminación del minifundiu y agrupación de propiedá.
  • Entidá Solicitante de la Certificación Forestal Rexonal del Principáu d’Asturies: pa la certificación forestal de sostenibilidá de los nuestros montes.

Estes inversiones, que suponen un apoyu importante pa la decena d’empreses y cooperatives forestales que trabayen n’Asturies, xeneren riqueza nel mediu rural y ayudaron a la medría tan importante del sector nos últimos años. 

Deja una respuesta

Tu dirección de correo electrónico no será publicada. Los campos obligatorios están marcados con *

2 × 4 =