La Conseyería de Cultura, Política Llingüística y Turismu reactiva esta seronda la campaña de promoción que destaca l’atractivu d’Asturies como referente de bienestar y calidá de vida y promueve vezos sostenibles. Esta segunda edición, na que’l filo conductor va ser el Camín de Santiago, va dar continuidá a la colección de reportaxes y vídeos divulgativos que dende la primavera de 2020 ufiertaba claves p’ameyorar tres el confinamientu.
Sol lema Un paísu nel Camín, y nos mesmos soportes que na primer edición, esta selmana presentóse’l primer episodiu d’una webserie que permite localizar, al traviés de los itinerarios asturianos de la ruta xacobea, aspectos venceyaos cola sostenibilidá y el bienestar. Los beneficios de l’actividá física, del descansu, del contactu cola naturaleza y del consumu de productos de calidá, xunto cola necesidá de desconectar pa facer frente al estrés, son los elementos centrales de los episodios, que se van estrenar cada quince díes.
Nos seis capítulos qu’integren la serie, l’actor asturianu Javier Gutiérrez va dir atopándose con distintes persones a lo llargo del Camín, ente otres, la chef Esther Manzano, el divulgador Paco Nadal, el ciclista Chechu Rubiera y l’abogáu Manolo Hernández, quien yá realizó más de cien pelegrinaciones a Santiago de Compostela. El primer capítulu de la webserie puede vese yá na canal de Youtube del diariu El País, nel enllaz enlace https://cutt.ly/5RiatHk.
Esta llinia de promoción convive, como yá asocedió en 2020, cola campaña institucional Asturies, Vuelve al Paraísu, qu’esta seronda va reforzase con acciones empobinaes específicamente a mercaos nacionales con conexón aérea directa, mesmo qu’a alredores próximos, y centraes especialmente nel turismu urbanu.
FONTE: Nota de prensa Gobiernu d’Asturies