Rescaten a dos senderistes desorientaos en Cuadonga

• Fueron alcontraos pol Grupu de Rescate a bordu del helicópteru medicalizado del SEPA enriba de la cueva de Cuadonga

El Grupu de Rescate de Bomberos d’Asturies, a bordu del helicópteru medicalizáu del Serviciu d’Emerxencies del Principáu d’Asturies (SEPA), rescató, en perfectu estáu, a una pareya de senderistas que se desorientó cuando realizaba una ruta de monte en Cuadonga, Cangues d’Onís.

Dambos, una muyer de 57 años y un varón de 60, tuvieron que ser rescataos por aciu dos tales operaciones de grúa col helicópteru nes que s’esplegaron casi 50 metros en caúna d’elles. La intervención resultó complexa abondo yá que los escursionistes atopábense nuna zona bien frondosa, con muncho arboláu qu’enzancaba la visibilidá y la operatividá de l’aeronave que realizó la intervención n’estacionariu.

En siendo rescataos y al atopase ilesos treslladáronlos hasta l’aparcamientu onde teníen aparcáu’l so vehículu. Fueron alcontraos nel monte Auseva, xusto enriba de la cueva de Cuadonga.

El Centru de Coordinación d’Emerxencies del 112 Asturies recibió l’avisu a les 11.16 hores. Fueron los mesmos afectaos los que contactaron con emerxencies. Esplicaron que taben faciendo la ruta d’Orandi y se desorientaron. Dende onde s’atopaben podíen ver la basílica pero nun podíen siguir caminando.

La Sala 112 del SEPA movilizó al Grupu de Rescate col helicópteru medicalizado y comunicó lo asocedío a la Guardia Civil y a los 112 de Cantabria y Castiella y Llión.

Rematada la intervención l’equipu tornó a la so base en La Morgal a les 13.06 hores.