Nuno Coelho, director titular nuevu de la Orquesta Sinfónica del Principáu d’Asturies

• La so candidatura llogró la mayor puntuación na fase final del procesu selectivu, na que se valoraron los méritos de les persones aspirantes y los sos proyectos
• El músicu portugués asume la dirección artística de la OSPA y el so llabor va tar subordináu a les decisiones del conseyu rector

El conseyu rector de la Orquesta Sinfónica del Principáu d’Asturies (OSPA) alcordó güei por unanimidá’l nomamientu de Nuno Coelho (Porto, 1989) como director titular nuevu de la formación. Nuna xunta estraordinaria, l’órganu escoyó al director ente les 30 candidatures presentaes a la convocatoria.

El procesu d’elección realizóse por aciu réxime de concurrencia competitiva y la comisión creada pa la valoración de les candidatures adoptó la decisión final. Mientres 3 años prorrogables, Coelho va asumir la máxima responsabilidá de la dirección artística de la OSPA, subordinada namás a les decisiones qu’adopte’l conseyu rector. Pal desempeñu de les sos funciones va cuntar col apoyu de la plantiya de la orquesta y les empreses nes que s’esternalicen dellos servicios.

Les funciones concretes del puestu son estes:

• Exercer la dirección titular de la OSPA.
• Ellaborar la programación artística de la temporada, con propuesta de directores y solistes convidaos.
• Dirixir ensayos, conciertos, grabaciones y actuaciones que-y correspuendan según la programación de la temporada.
• Caltener y incrementar la calidá y el proyectu artísticu de la formación nel contestu de la escelencia artística internacional, coles mires d’asitiar la OSPA como referente musical nel panorama européu.
• Presidir los tribunales de les audiciones pa miembros nuevos de la OSPA.
• Establecer xunto col concertinu la distribución por atriles de los profesores de la orquesta.
• Participar y asesorar nes actividaes educatives y sociales de la OSPA.
• Actividaes complementaries rellacionaes col funcionamientu y actividaes de la OSPA.
• Otres funciones d’igual naturaleza que, dientro del so ámbitu de competencia, sían-y encamentaes pola xerencia o’l conseyu rector de la OSPA.

Candidatura más valorada

El procesu selectivu constó de trés fases evaluaes por una comisión de valoración compuesta por trés miembros del conseyu rector de la OSPA, dos músicos de la orquesta y una persona esterna perteneciente al ámbitu musical, con esperiencia en programación artística nuna institución musical asturiana, nomada pol conseyu. Tal que se recoyía nes bases de la convocatoria, tres una primer valoración de los méritos alegaos poles persones aspirantes, pasaron a la tercer fase les trés candidatures que llograron mayor puntuación.

La última etapa, basada nuna entrevista énte la comisión de valoración, sirvió pa evaluar el proyectu y valorar l’adecuación, los conocencies, esperiencia y demás requisitos esixíos, según les habilidaes y capacidaes comunicatives y de lideralgu. El procesu remató con una propuesta unviada al Conseyu Rector de la OSPA, na que Nuno Coelho resultó’l meyor valoráu. Siguiendo lo dispuesto nos estatutos de la Orquesta, el Conseyu Rector designó por unanimidá a Nuno Coelho director titular nuevu de la OSPA.

Currículum de Nuno Coelho

Nuno Coelho, que fala portugués, español, alemán, italianu, francés y inglés, completa los sos estudios de violín en Klagenfurt y Bruxeles, y los estudios de dirección en Zúrich con Johannes Schlaefli. Foi director asistente de la Nederlands Philharmonisch Orkest ente 2015-2017. Los sos mentores fueron Gustavo Dudamel, Bernard Haitink, Susanna Mälkki, Andris Nelsons, Esa-Pekka Salonen, Christoph von Dohnányi y Daniele Gatti. Foi nomáu Dudamel Fellow na Filarmónica de Los Ánxeles na temporada 2018-19.

Ganador del Concursu Internacional de Dirección de la Orquesta de Cadaqués nel 2017, empezó a collaborar cola OSPA na temporada 2018-2019. Nel 2018 foi nomáu director convidáu de la Orquesta Gulbenkian de Lisboa y, de magar, collabora con ellos cada temporada en cuatro proyectos qu’incluyen conciertos, óperes semi-escenificaes, gales, xires y actividaes socioeducatives, lo qu’implica un trabayu conxuntu y siguío cola dirección de la orquesta. Casa da Música de Porto ye otra orquesta cola que trabaya de forma habitual.

Mientres les últimes temporaes dirixió a Los Angeles Philharmonic, Symphonieorchester deas Bayerischen Rundfunks, Royal Liverpool Philharmonic, BBC Philharmonic, Orchestre Philharmonique de Strasbourg, Orchestra del Teatru Regio Torino, Orchestre Philharmonique du Luxemburg, Antwerp Symphony, Netherlands Philharmonic (nel Concertgebouw), Residentie Orchestra, Sinfónica de Gävle, Sinfónica d’Hamburgo (na Elbphilharmonie) y Beethoven Orchester Bonn, mesmo qu’orquestes en Xapón, China y Arxentina.

Tres la so participación nes clases maxistrales de la Royal Concertgebouw Orchestra nel 2018, la orquesta reinvitó-y pa dirixir na temporada 2022-23. Ente otros próximos debúes y reinvitaciones tán Dresden Philharmonic, Staatsorchester Hannover, Helsinki Philharmonic, Tampere Philharmonic, Malmö Symphony, Sinfonieorchester St. Gallen, Antwerp Symphony, Orquestra Sinfónica do Porto, Orchestre National de Lille (en xira), Kitchener–Waterloo Symphony (el so debú en Canadá) y la São Paulo State Symphony Orchestra (el so debú en Brasil).

N’ópera, dirixió La Traviata, Cavalleria rusticana, Rusalka, Das Tagebuch d’Anne Frank, y asistió a Marc Albrecht na producción de Pierre Audi de Parsifal na Dutch National Opera.

El so perampliu repertoriu garra dende la dómina bárroca, clásica pasando pel Romanticismu hasta la música del sieglu XX y XXI. Comprometíu cola música contemporanea, dirixió 15 estrenos, inclusive nel icónico festival Green Umbrella de Los Ánxeles. Dirixió obres de Francisco Coll, Manuel Burgos, Gabriel Erkoreka, Raquel Tomàs, Jonathan Harvey, Caroline Shaw, Nuno da Rocha, y collaboró con Thomas Adès, Peter Eötvös y John Adams.

Coelho collabora con solistes y cantantes internacionales destacaos como Nikolai Lugansky, Jan Lisiecki, Bertrand Chamayou, Javier Perianes, Denis Kozhukhin, Nicolas Altstaedt, Stefan Jackiw, Akiko Suwanai, Pablo Ferrández, Chen Reiss y Camiya Tilling. Ye un apasionáu de la dirección de formaciones xóvenes.

Llogró’l primer premiu nel Concursu de Radiu de Portugal, el Premiu Neeme Järvi nel Festival Menuhin de Gstaad, y foi finalista nel Concursu de Directores Mozos del Festival de Nestlé y nel Concursu de Directores Mozos de Salzburgo. Nel 2014 recibió una beca de la Fundación Calouste Gulbenkian y nel 2015 foi almitíu nel Dirigentenforum del German Music Council.