Un senderista finó n’esnidiando y cayer unos 150 metros cuando realizaba la ruta del Llagu de la Cueva, na redoma del altu de La Farrapona, en Somiedu.
Hasta’l llugar del incidente movióse l’helicópteru medicalizado del Serviciu d’Emerxencies del Principáu d’Asturies (SEPA) col Grupu de Rescate del que forma parte una médica-rescatadora. Anque durante casi una hora tuvieron practicándo-y maniobres de soporte vital avanzáu finalmente namá pudieron confirmar el so fallecimientu. Tratase d’un varón de 20 años d’edá. La Guardia Civil fíxose cargu de los trámites para proceder al llevantamientu del cadabre.
El Centru de Coordinación d’Emerxencies recibió l’avisu a les 11.48 hores. El alertante indicaba que taba viendo dende llueñe a unos chicos pidir ayuda, unu d’ellos habíase cayíu y taba mancáu. Al llugar nun había accesu rodáu y había muncha nieve. Nesta zona disponese de poca cobertoria de telefonía móvil.
La Sala 112 del SEPA movilizó l’helicópteru medicalizado de Bomberos d’Asturies y al Grupu de Rescate. Paralelamente pasó l’avisu al SAMU y a la Guardia Civil ya informó de lo asocedío al 112 de Castiella y Llión.
A les 13.09 hores el Grupu de Rescate comunica qu’el senderista ta fináu, información que se tresllada a la Guardia Civil. Minutos dempués, dende la comandancia del institutu armáu, señalen que nun se muevan los restos mortales del fináu porque va allegar a la zona’l so helicópteru col GREIM para proceder al llevantamientu del cadabre.
En sacupando a los trés acompañantes del fináu hasta l’altu de La Farrapona, l’equipu tornó a la so base en La Morgal a les 15.09 hores.