Mediu Rural y el Serviciu d’Emerxencies refuercen la so collaboración pa la prevención y llucha contra quemes forestales

  • El Principáu, que va cuntar con una base de datos unificada sobro los puntos de toma d’agua pa llabores d’estinción, trabaya nel diseñu d’una rede qu’ameyore la captación en tol territoriu
  • L’Executivu impulsa les roces y les quemes controlaes pa esaniciar combustible del monte y refuerza los llabores de vixilancia de la Guardería del Mediu Natural

La conseyera de Presidencia, Rita Camblor, y el conseyeru de Mediu Rural y Cohesión Territorial, Alejandro Calvo, participaron güei na xunta del Comité de Prevención y Llucha contra les Quemes Forestales, na que s’alcordó reforzar los medios de coordinación ente’l Serviciu d’Emerxencies del Principáu (Sepa) y la Dirección Xeneral d’Infraestructures Rurales y Montes nesti ámbitu.

Na xunta d’esti organismu, creáu en 2021 dientro de la Estratexa Integral de Prevención y Llucha contra les Quemes Forestales n’Asturies 2020/2025, encetóse la creación d’una base de datos unificada del Sepa y el Serviciu de Montes sobro los puntos d’agua esistente y la necesidá de diseñar una rede óptima de depósitos en tola comunidá.

L’agua resulta esencial pa la estinción y control de les quemes, polo que disponer d’una rede de depósitos accesible y bien distribuyida nel territoriu resulta fundamental, especialmente nuna orografía tan complexa como l’asturiana. Amás, cuntar con una fayadiza rede de depósitos dexa ameyorar esta disponibilidad, según amenorgar los tiempos de desplazamientu y carga, lo qu’aumenta la eficacia de los llabores d’estinción. Por esta razón, ta revisándose la operatividad y l’estáu de los actuales, de la que s’ellaboren xunas instrucciones técniques sobro cómo tendríen de distribuyise pa garantizar tanto l’accesu a medios aéreos como terrestres.

Na mesma llínea de collaboración, analizóse la necesidá de favorecer el manexu conxuntu de les estadístiques de quemes forestales qu’ellabora’l Sepa y del visor d’información sobro esta mesma materia del Serviciu de Montes.

Tamién s’alcordó realizar un simulacro de quema forestal de gran escala nos próximos meses, al envís d’analizar y ameyorar tolos preseos de coordinación na llucha contra’l fueu. Ta previstu llevalo a cabu nel últimu trimestre del añu, coincidiendo col fin de la campaña de branu.

La conseyera de Presidencia destacó la importancia de siguir trabayando tantu nes actuaciones directes de prevención, por aciu los llabores que se realicen sobro’l terrén pal control del combustible que s’atropa nel monte y el caltenimientu de les infraestructures, como na concienciación de la ciudadanía pa garantizar actitúes responsables respectu al fueu.

Pela so parte, Alejandro Calvo destacó que la prevención y el control son posibles con planes eficaces de xestión agrícola y forestal, sumaos a la sensibilización de la población. Nesti sentíu, valoró los llabores de roza y quemes controlaes p’amenorgar combustible nel monte y garantizó el refuerzu de los llabores de vixilancia sobro’l terrén per parte de la Guardería del Mediu Natural.

El Comité de Prevención y Llucha contra les Quemes Forestales tien por oxetu ameyorar la planificación y coordinación d’acciones y recursos humanos y materiales. Ta formáu por técnicos de la Dirección Xeneral d’Infraestructures Rurales y Montes, de la área de Bomberes del Sepa, un técnicu del departamentu de Protección Civil del Sepa y otru de la Dirección Xeneral de Mediu Rural y Planificación Rural. Anguaño, lo copresiden Alejandro López, per parte del Serviciu de Montes, y Eduardo Rubio, per parte del Sepa.

Deja una respuesta

Tu dirección de correo electrónico no será publicada.

diecinueve + once =