Mediu millar de comercios de proximidá desenvuelven yá un itinerariu personalizáu pa incorporar soluciones dixitales

• El programa de modernización impulsáu por Industria evaluó 1.007 negocios nel so primer añu d’execución y prevé realizar diagnósticos a otros 1.600 esti exerciciu
• Al amparu del DICA lleváronse a cabu 140 acciones de sensibilización y espardimientu y cien tiendes recibieron el distintivu Comerciu con compromisu dixital
• La iniciativa, perbién acoyida pol sector, va fomentar la microformación adaptada a los profesionales

El Programa de Dixitalización Integral del Comerciu d’Asturies 2021-2023 (DICA) evaluó 1.007 establecimientos de proximidá nel so primer añu d’execución, de los que mediu millar yá tán desenvolviendo un itinerariu personalizáu pa incorporar ferramientes dixitales na so actividá.

La puesta en marcha d’esti programa, pioneru n’Asturies y financiáu íntegramente pol Principáu con 5,1 millones, tien como oxetivu apoyar el tresformamientu tecnolóxicu del comerciu minorista énte l’escasu nivel de madurez dixital del sector. El plan foi impulsáu pola Conseyería d’Industria, Empléu y Promoción Económica nel marcu del diálogu social y cuenta cola collaboración de la Fundación CTIC como sociu tecnolóxicu. Los resultaos confirmen la pertinencia d’esta iniciativa, cuidao que na evaluación del primer millar d’establecimientos confirmóse que menos del 7% tienen un grau de madurez dixital avanzada.

De los 1.007 comercios evaluaos, 796 manifestaron interés en participar nel programa y, d’ellos, 500 empecipiaron yá’l so procesu d’acompañamientu. Anguaño va trabayase colos 296 negocios restantes, potencialmente beneficiarios del itinerariu personalizáu.

L’itinerariu d’acompañamientu empieza con un diagnósticu detalláu de la dixitalización de los procesos del comerciu pa ellaborar propuestes de meyora y diseñar un plan d’acción personalizáu. Nun períodu de seis meses realízase un siguimientu del establecimientu, que cunta con acompañamientu pa la puesta en marcha de les midíes plantegaes; por casu, el desenvolvimientu d’una páxina web o d’una tienda online, la incorporación de redes sociales, la ellaboración de planes de marketing telemáticu o la creación d’una relación dixital con provisores y veceros. Trescurríu esi plazu, realízase una evaluación.

Tamién se realizaron 139 acciones de sensibilización, divulgación, capacitación y demostración, na so mayor parte con sesiones y xornaes presenciales, nes que participaron 1.260 persones. Según la Fundación CTIC, superáronse tolos oxetivos previstos.

Amás, otórgase los distintivos Comerciu con compromisu dixital a los cien establecimientos más adelantraos nos itinerarios, coles mires de reconocer el so esfuerzu de cambéu y modernización. Paralelamente, suscribiéronse alcuerdos con 18 asociaciones sectoriales locales y collaboróse con conceyos, cámares de comerciu, grupos de desenvolvimientu local y otres entidaes.

 Pa esti ‘añu, plantégense los siguientes oxetivos:

• Evaluar 1.600 comercios.
• Acompañar a 600 establecimientos.
• Desenvolver acciones de microformación adaptada  a les necesidaes y disponibilidá de los profesionales, cola previsión de llegar a 320 negocios ya impartir 9.600 hores (30 hores por cada establecimientu).
• Otorgar 700 distintivos Comerciu con compromisu dixital ya identificar y espublizar 20 nueves bones práctiques.
• Arreyar, polo menos, a otres cinco asociaciones nel programa.
• Implantar una nueva aplicación denominada ShopNote en comercios del sector de moda y calzáu pa testar el so funcionamientu ya incorporar meyores nun contestu real.​