Cultura llanza una campaña pa visibilizar el papel de la muyer nel mundu deportivu

• Col lema Muévite pola igualdá, difunde la historia de muyeres deportistes o profesionales que trabayen pola promoción de l’actividá física femenina
• Los materiales punxéronse a disposición de conceyos y centros escolares pa les sos actividaes de promoción de la igualdá

Dar a conocer el trabayu de muyeres que dende distintos roles y oficios trabayen pa visibilizar el deporte femenín. Ésti ye l’oxetivu de la campaña Muévite pola Igualdá, impulsada dende la Dirección Xeneral de Deporte de la Conseyería de Cultura. La iniciativa ta financiada con fondos del Pactu d’Estáu contra la Violencia de Xéneru y busca proyectar el papel y les xeres de les muyeres dientro del universu deportivu pa menguar les diferencies tan escomanaes qu’entá existen colos homes al respective de condiciones de trabayu y visibilidá.

Muévite pola igualdá va difundir los testimonios en primer persona de deportistes, entrenadores, árbitres o periodistes deportives pa mostrar el llabor que se fai a diario pa promover l’actividá física femenina, les principales dificultaes qu’atopen nel camín y tamién los retos pendientes. Pal Gobiernu d’Asturies, la tresversalidá de les polítiques d’igualdá ye imprescindible, y nel mundu del deporte la resquiebra de xéneru resulta bien evidente y relevante.

La corredora de carreres de monte Alba de Mendiolagoitia Díaz, la xueza internacional de remu Ángela Alonso o la nadadora, entrenadora y directora técnica de la Federación de Deportes pa Persones con Discapacidá Física del Principáu d’Asturies (Fedema) Beatriz Álvarez Valderrama, son dalgunes de les cares de la campaña. Luisa Álvarez Iglesias, ex-palista y entrenadora de piragüismu; Natasha Llee Suárez, xugadora d’h.oquei sobre patinos; Victoria Ortiz de Guinea Argüelles, campeona del mundu d’agua xelao y Cristina Gallo y Estela Noriega, periodistes deportives, completen l’elencu de muyeres que participen en Muévite pola Igualdá.

La Dirección Xeneral de Deporte punxo a disposición de los conceyos y la rede de centros escolares tolos materiales de la campaña p’ampliar el circuitu de difusión y tamién pa que puedan utilizalos como recursu dientro de les actividaes y xornaes qu’entamen pa la sensibilización y promoción de la igualdá ente homes y muyeres.​​​​​​