Los equipos d’inspección del Sespa van xestionar les baxes y altes llaborales por covid

El Serviciu de Salú del Principáu (Sespa) pon en marcha un nuevu procedimientu para la tramitación de les baxes y altes llaborales para casos confirmaos de covid-19. D’esta miente, a partir de güei, los equipos d’inspección van encargase d’esti trámite.

Les persones con una prueba diagnóstica positiva van recibir una llamada del equipu de rastrexu na que se-yos va preguntar, ente otra información, sobro la necesidá de tramitar una baxa llaboral. En casu afirmativu, l’equipu de vixilancia va empecipiar esti trámite, polo que nun va ser necesariu’l contactu col centru de salú pa esta xestión.

L’equipu d’inspección va recibir diariamente xuna relación de los casos confirmaos colos datos identificativos pa validar y tramitar tanto les baxes como les altes. Pela so parte, los trabayadores van recibir un SMS de confirmación de que la xestión realizóse con ésitu nel que se-yos va indicar tamién el día de baxa y d’alta llaboral.

Nel casu de que les persones afectaes pertenezan a mutualidaes que precisen la realización d’otros partes por aciu el talonariu específicu, el serviciu d’inspección va unviar los sos datos al centru de salú pa la so tramitación.

Aquellos pacientes que precisen los sos partes de baxa y alta en formatu papel, nun plazu de 48 a 72 hores van poder unviar a una persona autorizada a recoyelos n’horariu de mañana a la unidá alministrativa del so centru de salú.

Los casos positivos que nun cumplan los requisitos pa l’alta al séptimu día van poder xenerar otra baxa a partir del octavu, siempres y cuando sían pacientes identificaos por aciu llabor de siguimientu clínicu per parte del personal de los equipos d’atención primaria.

Esti nuevu procedimientu poner en marcha énte la medría de casos rexistraos nes últimes selmanes y col fin d’entainar los trámites y menguar la carga burocrática de los centros d’atención primaria.

Deja una respuesta

Tu dirección de correo electrónico no será publicada.

13 + 11 =