La cultura sidrera asturiana, candidata española pa la so inclusión na Llista Representativa del Patrimoniu Mundial Inmaterial de la Unesco

La cultura sidrera asturiana va ser la candidata que va presentar España en marzu del 2022 énte la Organización de les Naciones Uníes pa la Educación, la Ciencia y la Cultura (Unesco) pa la so inclusión na Llista Representativa del Patrimoniu Mundial Inmaterial. El Conseyu de Patrimoniu Históricu Español tomó güei esti determín, a propuesta de la Conseyería de Cultura, Política Llingüística y Turismu del Principáu, na so xunta semestral, celebrada en Menorca.

L’alcuerdu supón un pasu decisivu pa llograr la reconocencia de la Unesco, depués de más d’ocho años de trámites qu’empezaron colos preparativos pa la declaración de la cultura sidrera como bien d’interés cultural inmaterial, recoyida nel decretu 64/2014, de 11 de xunetu. De siguío, el Gobiernu del Principáu constituyó un grupu de trabayu, formáu por representantes de la denominación d’orixe protexida (DOP) Sidra d’Asturies, antropólogos, historiadores y estudiosos, que s’encargó d’ellaborar l’espediente técnicu analizáu agora pol organismu encargáu d’escoyer les candidatures españoles a patrimoniu mundial inmaterial.

La inclusión de la cultura sidrera na llista de patrimoniu inmaterial diba reforzar el sentimientu d’estima que la comunidá siente al so productu más identitariu. Amás, diba ayudar de manera decisiva a difundir el respetu por unes práctiques y tradiciones qu’otorguen sostenibilidá al mundu rural autóctonu. La reconocencia tamién diba ayudar a revitalizar les actividaes agraries lligaes a la producción de la bebida y a dinamizar el sector, amás d’impulsar les actividaes turístiques y hosteleres.

L’espediente va presentase en marzu del 2022 énte la Unesco y, a partir d’entós, va abrise un procesu d’evaluación pol altu organismu internacional que va durar daqué más d’un añu.

Los argumentos clave que xustificaríen la inclusión de la cultura sidrera na llista de patrimoniu inmaterial son estos:

  • La sidra non solo ye un productu fundamental de la economía asturiana, sinón tamién un referente simbólicu, parte consustancial de la identidá colectiva y d’una cultura con personalidá propia, estremada de les d’otres zones europees productores (País Vascu, Normandía, Bretaña o Inglaterra).
  • La cultura sidrera incluye un conxuntu de práctiques vinculaes a procesos de producción, distribución y consumu que se vienen desenvolviendo, polo menos, dende l’Alta Edá Media.
  • La sidra favoreció a lo llargo del tiempu rellaciones y vínculos ente un productu de la tierra d’orixe llabrador, un territoriu y una población. Desenvolviéronse conocencies locales y desplegáronse práctiques xeneradores d’espacios de producción y de consumu idiosincrásicos que persisten güei. La so riqueza cultural refléxase nun vocabulariu específicu y orixinal en llingua asturiana.
  • L’echáu, manera típica y esclusiva de sirvir la sidra, ye la práctica que-y da mayor grau de diferenciación.
  • El conxuntu de práctiques lligaes a la cultura sidrera supón un elementu identificador de lo asturiano y ún de los sos emblemes principales. Amás, estimula la formación y el refuerzu de vínculos sociales que confieren pertenencia y continuidá a la comunidá.
  • La cultura de la sidra ye un exemplu de respetu ente individuos, grupos y comunidaes. Tanto nes sos formes tradicionales como nes más adaptaes a los nuevos tiempos, el consumu del caldu rexonal llévase a cabu de manera preferentemente comunal y favorez l’alcuentru de persones de procedencies y sectores sociales diversos. Práctiques firmemente enraigonaes como’l compartir vasu a la hora evidencien la dimensión fraternal y socialmente abierta de la cultura sidrera.
  • L’echáu tamién ye un bon reflexu del respetu mutuu fomentáu pola cultura sidrera. Nos munchos concursos d’echadores celebraos na comunidá participen a menudo persones llegaes de fuera d’Asturies, inclusive d’otros continentes. Amás, ente los miembros de los xuraos figuren davezu muyeres, igual que n’organismos como l’Asociación d’Escanciadores d’Asturies, que la so presidencia recayó a lo llargo d’años nuna muyer.
  • La sidra como símbolu y productu de la mazana remite a un paisaxe natural que’l so respetu forma parte consustancial de la identidá asturiana. Asina, la combinación de tradición y adaptabilidá de la cultura sidrera ta na exa d’estratexes de desenvolvimientu sostenible.

Homenaxe a Garrido y al vocabulariu de la sidra

La Conseyería de Cultura, Política Llingüística y Turismu va poner en marcha a últimos d’añu una campaña sobre’l léxicu vinculáu a la cultura sidrera, caracterizáu por términos inequívocamente asturianos.

Dientro d’esa iniciativa, destaca l’homenaxe del dibuxante Ernesto García del Castillo, Neto, al popular cartel ¿Qué tien la sidra?, realizáu va más de 40 años por Elías Antonio Garrido Barrientos (1933-2019), conocíu como Garrido. El recuerdu consiste na actualización d’aquella ilustración tan popular, incorporando la realidá social asturiana de güei, ensin perder la esencia, la tradición y l’humor qu’utilizó Garrido pa representar la cultura sidrera.

El Principáu quier facer llegar el cartelu nuevu a toles sidreríes asturianes xunto a documentación llingüístico relativo al palabreru sidreru, na que Cultura trabaya anguaño.

Fuente: Nota de prensa Gobiernu d’Asturies

Deja una respuesta

Tu dirección de correo electrónico no será publicada.

cuatro × 5 =