La Conseyería d’Educación va reforzar la enseñanza de la cultura asturiana na etapa d’Infantil

• Los grupos de trabayu del currículu nuevu van incluyir de manera transversal el contestu onde ta inmersu l’alumnáu

La Conseyería d’Educación va reforzar la enseñanza de la cultura asturiana dende la etapa d’Infantil, introduciendo nel currículu elementos tresversales que tengan en cuenta’l contestu nel que ta somorguiáu l’alumnáu. Asina apaez reflexao nos protocolos que s’usaron nos grupos de trabayu que tán rematando’l desenvolvimientu de la LOMLOE pa la etapa d’Infantil.

La idea esencial consiste en tresmitir al alumnáu dende edaes tempranes conteníos de sensibilización de la contornada escolar. La Conseyería d’Educación valora la importancia d’estimular la observación, desenvolver l’interés, el respetu y l’interés pol caltenimientu de la cultura y la tradición asturianes. 

El currículu nuevu d’Infantil estrémase en trés árees: Medrar n’harmonía, Descubrir, disfrutar y esplorar la rodiada y Comunicar y representar la realidá. La conseyera d’Educación, Lydia Espina, considera qu’esi refuerzu de la cultura asturiana “encaxa a la perfección dientro del desenvolvimientu de los conteníos de les dos últimes árees, d’una manera tresversal”.

Espina esplicó que se trata de tomar como referencia la realidá que vive l’alumnáu, y destacó “la importancia de la educación n’edaes tempranes pal desenvolvimientu de les capacidaes de la persona”. Con estes premises, l’Alministración educativa entra na fase final de la ellaboración del currículu d’Infantil.

Amás, pa esta etapa tamién s’optó por potenciar l’aprendimientu del Inglés, cola so implantación pela primer vez pal alumnáu de trés años, de forma lúdica y comunicativa.​​​​​​​