La Conseyería de Salú detectó l’añu pasáu 46 infecciones nueves del virus d’inmunodeficiencia humana (VIH), 18 menos que nel 2019, cuando se diagnosticaron 64. La Dirección Xeneral de Salú Pública atribuye esta mengua al confinamientu y el infradiagnósticu a lo llargo de la pandemia.
La tasa d’infección por VIH asítiase nel 2020 en 4,5 casos por cada cien mil habitantes.
Amás, el 93,5 % de les infecciones nueves foi per vía sexual, mentes que nel 6,5 % de los casos desconócense los motivos y nun se notificó nengún positivu por tresmisión endovenosa.
Más de la metá de los positivos nuevos diagnosticáronse tarde, polo que resulta imprescindible la promoción del diagnósticu precoz pa menguar el númberu de persones con infección ensin detectar.
Tocante a la incidencia por sexos, el 73,9 % de los casos positivos afecten a homes y el 26,1 %, a muyeres.
El 54,3 % de les infecciones foron por tresmisión heterosexual (61 % n’homes y 39 % en muyeres) y el 39,1 % rexistróse ente homes que caltienen rellaciones sexuales con otros homes.
La edá media de diagnósticu asítiase en 41 años y la mediana, en 38. El grupu de población más afectáu poles infecciones nueves son homes de 25 a 44 años.
L’añu pasáu, 2.676 persones recibieron tratamientu por esta enfermedá n’Asturies.
Los llaboratorios de la rede sanitaria pública realizaron l’añu pasáu 36.540 pruebes de VIH. Amás, contabilizáronse otres 197 rápides en farmacies y 195 más na Asociación Comité Ciudadanu Anti-Sida.
La importancia de la prevención
La sanidá pública asturiana dispón de trés unidaes de dispensación de profilaxis pre-esposición al VIH (PrEP), una estratexa combinada que busca la prevención y mengua d’infecciones nueves por VIH en persones seronegatives con riesgu altu de contraer la infección. Esti métodu básase nel usu de fármacos antirretrovirales antes de la esposición al virus, xunto a un paquete de midíes preventives p’ameyorar l’adherencia y promocionar comportamientos de menor riesgu. Con esti programa rastréxense tamién otres infecciones de tresmisión sexual.
Según los espertos, l’usu del preservativu sigue siendo’l métodu más eficaz de prevención y el que menos efectos secundarios trai. Nesti sentíu, el Principáu repartió 277.632 profilácticos masculinos y 5.000 femeninos nel 2020.
Día Mundial de la Llucha contra’l Sida
Güei, día 1 d’avientu, celébrase’l Mundial de la Llucha contra’l Sida. La Organización de les Nacionales Uníes (ONU) escoyó pa esta ocasión el lema Sida: Poner fin a les desigualdaes, poner fin al sida, poner fin a les pandemies.
Pela so parte, el Ministeriu de Sanidá llanzó anguaño la campaña Vivi en positivo, a la que s’adhirió Asturies. L’oxetivu ye concienciar a la población xeneral sobre’l respetu necesariu pa coles persones con infección por VIH, amás de sensibilizar y informar sobre’l derechu a la igualdá d’oportunidaes pa evitar situaciones de discriminación.