El Principáu impulsa la campaña ‘Yes movimientu’ pa promocionar l’actividá física ente la población infantil y mozo

La Conseyería de Cultura, Política Llingüística y Turismu impulsa, al traviés de la Dirección Xeneral de Deporte, la campaña Yes movimientu, pa promocionar l’actividá física ente la población xeneral, pero dirixida especialmente a escolares de 6 a 16 años. Les midíes derivaes de la pandemia del coronavirus amenorgaron notablemente la participación deportiva nel ámbitu escolar, polo qu’esta iniciativa busca volver incentivala.

Al traviés de polítiques de prevención, como la mesma campaña, Deporte quier combatir la obesidá, un importante factor de riesgu pal desenvolvimientu d’enfermedaes non trasmisibles. L’escesu de pesu ente la población asturiana ye muncho más altu de lo deseable y la so prevalencia tan grande convierte esti fechu nun problema de salú pública. Esmolez especialmente la presencia de diabetes tipu II y los altos niveles de colesterol, unos rexistros qu’antes solo se víen n’adultos y qu’agora apaecen de forma frecuente ente neños y neñes.

La población infantil yá dedicaba más hores de les recomendables a los xuegos sedentarios basaos en pantalles primero de la crisis sanitaria. Esta situación tiende a empiorar cuando llega la mocedá, pos el pasu a la educación Secundaria suel traer l’abandonu del deporte regláu, una situación más acusada ente les moces.

Por esta razón, Deporte tien ente los sos oxetivos promocionar l’actividá física, que tien de realizase a diariu nes etapes de la infancia y l’adolescencia. Con esti oxetivu, tán desenvolviéndose actuaciones específiques, integrales y multisectoriales basaes n’aliances y na puesta en común d’esfuerzos.

Según datos de los Xuegos Deportivos, la participación nel ámbitu escolar amenorgó un 50%. La pandemia y les midíes de prevención a les qu’obligó la enfermedá tán detrás del sedentarismu que s’integró na rutina de persones qu’antes yeren actives. La campaña Yes movimientu trata de revertir esta situación y busca estos oxetivos:

  • El fomentu de l’actividá deportiva ente la infancia y la mocedá, tanto que s’entame como que se retome, subrayando la importancia de nun abandonala.
  • Concienciar a las persones adultes encargaes del cuidáu de población infantil sobre la relevancia que l’actividá física tien pa la salú.
  • Estimular ente tola población l’actividá física y la reducción del ociu sedentariu, teniendo siempre en cuenta l’exemplu que la población adulta supón pa los neños y neñes.

La campaña, que va tar presente en medios dixitales y mupis, desenvuélvese en trés llingües: en castellanu (Eres movimiento), n’asturianu (Yes movimientu) y n’eo-naviego (Es movemento).​​​​​​

Deja una respuesta

Tu dirección de correo electrónico no será publicada.

cuatro + 16 =