La campaña de la renta empieza con deducciones nueves aprobaes pol Principáu p’atrayer y retener talentu y fixar población nes zones rurales

• L’aumentu nes bonificaciones pola rehabilitación de viviendes protexíes ye otra de les novedaes p’anguaño

La campaña de la renta 2021, qu’entamaba ayeri, presenta una serie de beneficios fiscales nuevos n’Asturies, frutu de les midíes aprobaes nel presupuestu del Principáu del añu pasáu. D’esta manera, los contribuyentes que cumplan los requisitos van poder acceder a les deducciones nueves, concebíes p’atrayer y retener talentu y afitar la población nes zones rurales, amás de beneficiase d’una meyora de les yá existentes.

Asina, nesta campaña entren en vigor dos deducciones nueves que se propunxeron cola mira de retener y al empar atrayer a trabayadores cualificaos especialmente. Va poder aplicase esta deducción, d’hasta 2.000 euros, a aquelles persones qu’afiten el domiciliu n’Asturies y empiecen l’actividá profesional na comunidá. Igualmente, van resultar beneficiarios los contribuyentes que s’incorporen al mercáu llaboral en trabayos rellacionaos, directa y principalmente, con actividaes d’investigación y desenvolvimientu, científiques o de calter técnicu.

Amás, intensifíquense les midíes puestes en marcha nel 2020 y empobinaes a afitar población nel mediu rural. Ente les novedaes empobinaes pa los residentes en zones rurales en riesgu de despoblación, destaca la creación d’una deducción del 10 % de la inversión efectuada pa l’adquisición o rehabilitación de vivienda habitual, aplicable a contribuyentes d’hasta 35 años, families numberoses y monoparentales.

Los residentes nestes zones van disfrutar, amás, d’una meyora nos porcentaxes de deducción pol arrendamientu de la vivienda habitual –que xube hasta’l 20 %, frente al porcentaxe xeneral del 10 %– y nos gastos por descendientes matriculaos en centros de 0 a 3 años, que xube del 15 % al 30 %. Amás, dóblase la cantidá deducible correspondiente a gastos de tresporte, al pasar de 50 a 100 euros.

P’acabar, n’ámbitu de la vivienda y pa tolos contribuyentes, ameyórase la deducción por adquisición o rehabilitación de vivienda habitual que tenga la consideración de protexida, frutu del alcuerdu de concertación social. L’importe de la deducción va poder algamar los 5.000 euros, frente al tope de 113 aplicable hasta’l 2020.