- El documentu va sirvir pa planiar, nun marcu análogu al européu, el desenvolvimientu de les distintes comarques funcionales de la comunidá
- L’Executivu autonómicu, en collaboración cola Federación Asturiana de Conceyos, va encarar un trabayu específicu pal área central y les ales
El viceconseyeru d’Infraestructures, Movilidá y Territoriu, Jorge García, y la directora xeneral d’Ordenación del Territoriu y Urbanismu, Sonia Puente Landázuri, reuniéronse güei col director xeneral d’Axenda Urbana y Arquitectura del Ministeriu de Tresportes, Movilidá y Axenda Urbana, Iñaqui Carnicero, na que s’alcordaron los términos del protocolu d’actuación ente dambes alministraciones pal impulsu de l’Axenda Urbana y Rural d’Asturies (AURA).
L’Axenda Urbana de la Unión Europea (UE) supón un conxuntu coherente d’acciones —impulsaes polos actores comunitaries clave— pa desenvolver al máximu’l potencial de les zones urbanes y favorecer la so contribución a los oxetivos comunes a nivel nacional y de la UE. Por tanto, la so misión fundamental ye fortalecer la dimensión urbana de les polítiques estatales y comunitaries. Nesti contestu, plantégase una forma nueva de gobernanza multinivel por aciu la cual les instituciones europees, los estaos miembros, les ciudaes y otros actores trabayen en xunto.
Nel casu d’Asturies, la redacción de l’Axenda Urbana y Rural empieza col propósitu y la singularidá de poner en relación les árees urbanes y rurales, que na comunidá entemécense y retroaliméntense, potenciando la sinerxa ente les distintes comarques, al serviciu de la productividá y la competitividá. L’AURA va dexar definir, sobre les comarques funcionales repartíes per tol territoriu, una zona funcional nueva que va recoyer el calter metropolitanu de la rexón.
Nes selmanes próximes, la Conseyería de Mediu Rural y Cohesión Territorial va avanzar nestes cuestiones de forma coordinada colos conceyos que yá tienen en marcha la redacción de la so propia axenda urbana (Ayer, Castropol y Xixón) y tamién de la mano del restu de conceyos. L’oxetivu que busca’l Principáu ye impulsar un trabayu específicu pal desenvolvimientu tanto del área central como de les comarques occidental y oriental, en collaboración cola Federación Asturiana de Conceyos, cola mira d’establecer una gobernanza compartida qu’ameyore la calidá de vida de la ciudadanía.