• 28 de marzo de 2024 15:52

El Principáu impulsa la meyora de la calidá de los servicios públicos pa encarar el retu demográficu y afitar población nel mediu rural

PorRedacción

Oct 5, 2021

El Gobiernu d’Asturies impulsa la meyora de la calidá de los servicios públicos pa encarar el retu demográficu, afitar población y crear actividá económica y empléu nel mediu rural. El vicepresidente Juan Cofiño y les conseyeres de Facienda, Ana Cárcaba, y de Derechos Sociales y Bienestar, Melania Álvarez; el conseyeru de Mediu Rural y Cohesión Territorial, Alejandro Calvo, y el comisionáu pal retu demográficu, Jaime Izquierdo, comparecieron güei na comisión especial de la Xunta Xeneral pa esponer les polítiques del Executivu nesti ámbitu.

El vicepresidente y conseyeru d’Alministración Autonómica, Mediu Ambiente y Cambéu Climáticu señaló que la prestación de servicios como’l saniamientu, el suministru d’agua y la xestión de residuos resulta clave pa que los habitantes de les zones rurales esfruten d’unes condiciones de vida asemeyaes a les de los espacios urbanos.

“Estos servicios contribuyen a la cohesión territorial y son indispensables si quier captase y afitar población p’amenorgar la fienda demográfica ente dambos sistemes de poblamientu”, sorrayó Cofiño. Tamién aseguró que l’Executivu autonómicu “trabaya p’amenorgar el riesgu de que la despoblación y l’avieyamientu conduzan a un amenorgamientu de la calidá de los servicios básicos”.

Nesti sentíu, indicó que tanto’l plan de residuos como los planes directores de suministru, saniamientu y depuración d’agües empresten atención especial a les necesidaes de les zones menos poblaes, cola mira de dar prioridá a inversiones “que dexen ufiertar servicios que faigan interesante’l mediu rural pa vivir y afayadizu pa desenvolver una actividá económica”. Asina mesmo, sorrayó qu’estos compromisos tienen reflexu presupuestariu y citó como exemplos el saniamientu de Bual y del Altu Ayer, con partíes percima de los cinco millones.

Al so xuiciu, tamién la llucha contra’l cambéu climáticu ufierta oportunidaes pal caltenimientu de les comunidaes rurales y la creación d’empléu, yá que la transición escontra una economía descarbonizada rique midíes xustes pa estes árees. Nesti campu, citó actuaciones como la recuperación de suelos contaminaos de vieyes esplotaciones mineres en Riosa y L.lena.

D’otra manera, sorrayó que la reforma de l’Alministración autonómica qu’impulsa’l so departamentu va incidir notablemente nos territorios más alloñaos del centru. “L’Alministración asturiana va ser más próxima, esi ye’l nuestru compromisu, y los nuestros meyores aliaos van ser los nuevos desenvolvimientos en telecomunicaciones y la dixitalización”, valoró.

Servicios sociales, cohesión territorial y fiscalidá

Mientres la so intervención, Melania Álvarez incidió na notable descentralización del sistema de servicios sociales y la so importancia a la d’enfrentar l’avieyamientu y la despoblación. Sobre esti aspectu, recordó que los servicios d’ayuda a domiciliu beneficiaron a 10.800 persones nel 2020 y xeneraron más de 2.100 empleos. Tamién señaló que, nos cuatro años últimos, la inversión n’árees de rehabilitación y rexeneración urbana algamó los 6,2 millones y dexó rehabilitar 474 viviendes en 15 conceyos rurales.

Na so intervención, Cárcaba, sorrayó que nos presupuestos del 2020 aprobáronse trés deducciones nueves sobre la cuota íntegra autonómica del IRPF pa contribuyentes con domiciliu habitual en zones rurales en riesgu de despoblación y qu’eses midíes ameyórense nes cuentes d’anguaño, de la que se creó una deducción nueva por adquisición o rehabilitación de vivienda nestes redolaes. Amás, aseguró que’l Gobiernu ta en disposición de siguir afondando n’acciones tributaries qu’aumenten l’atractivu del mediu rural pa vivir y trabayar.

Amás, Calvo sorrayó la voluntá del Executivu d’avanzar escontra un modelu de desenvolvimientu territorial, económicu y social más equilibráu, de manera coordinada y tresversal. Ente otres prioridaes, citó l’impulsu a la crecedera económica por aciu la inversión n’infraestructures, la cohesión territorial y l’aumentu de l’actividá productiva nel mediu rural, con atención especial a l’agricultura y la ganadería.

Fonte: Nota de prensa Gobiernu d’Asturies

Deja una respuesta

Tu dirección de correo electrónico no será publicada. Los campos obligatorios están marcados con *

10 + 10 =

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies