El Gobiernu d’Asturies, al traviés de la Dirección Xeneral de Tresportes y Movilidá, va poner en marcha un programa nuevu de movilidá sostenible. Tal como adelantó’l presidente, Adrián Barbón, nel debate d’orientación política, el Principáu va realizar un esfuerciu curiosu p’aumentar la ufierta de tresporte públicu nes zones rurales, adaptar les sos frecuencies a les demandes de la población y facilitar l’accesu de los usuarios a la información.
El programa nuevu busca ameyorar la calidá de vida de los vecinos del mediu rural, facilitando’l so accesu a servicios sanitarios, asistenciales y educativos. Pa eso, va maximizase l’aprovechamientu de los recursos que yá existen, como les rutes de tresporte escolar, y van ameyorase y ampliase los servicios actuales. Tamién se va impulsar la collaboración institucional y alministrativa.
El Consorciu de Tresportes d’Asturies (CTA) dispón na actualidá d’una rede importante de tresporte públicu qu’atiende 423 itinerarios de servicios d’usu xeneral, lo que supón realizar 704.975 espediciones y percorrer 18,7 millones de quilómetros al añu.
Los servicios ufiertaos por esta rede compleméntense cola integración de bona parte de les rutes de tresporte escolar, favoreciendo l’usu compartíu por escolinos y residentes de zones rurales. D’esta manera, a los servicios d’usu xeneral súmense 939 rutes coles que se realicen 338.221 percorríos anuales.
El proyectu de movilidá rural y cohesión territorial del Gobiernu d’Asturies va reforzar esta ufierta p’atender la dispersión tan alta de la población y facilitar l’accesu al tresporte públicu de tolos habitantes, ayudando asina a afitar población nel mediu rural.
Coordinación colos conceyos al traviés de la FACC
El conseyeru de Mediu Rural y Cohesión Territorial, Alejandro Calvo, informó güei sobre esti proyectu a la presidenta de la Federación Asturiana de Conceyos (FACC), Cecilia Pérez, nuna xunta na que tamién participaron el viceconseyeru d’Infraestructures, Movilidá y Territoriu, Jorge García, y el director xeneral de Tresportes y Movilidá, José Manuel Caldevilla.
Los responsables de la conseyería tamién propunxeron a la presidenta de la FACC que cada conceyu designe a una persona qu’exerza de coordinadora col CTA. L’oxetivu ye facilitar la interlocución ente alministraciones y l’intercambéu d’información, tanto sobre los servicios de tresporte públicu a disposición de la ciudadanía como de les necesidaes de cada conceyu.
Fuente: Nota de prensa Gobiernu d’Asturies