El Gobiernu d’Asturies suscribió ayeri en Casu un alcuerdu cola Asociación d’Ecoturismu n’España pa facilitar la certificación d’empreses turístiques. Esti conveniu, dotáu con más de 18.000 euros, va facilitar la incorporación de destinos y compañíes nueves a esta entidá, amás de sofitar la renovación d’aquelles que yá cunten con esta distinción.
“La nuesa voluntá ye que tolos espacios protexíos asturianos vaigan sumándose al Club Ecoturismu n’España y consolidar Asturies como líder del ecoturismo n’España”, sorrayó la viceconseyera de Turismu, Graciela Blanco. Tamién señaló que’l Principáu ye la segunda comunidá en convertise en miembru de plenu derechu d’esta asociación nacional.
El Club Ecoturismu ye una iniciativa pionera de l’Asociación d’Ecoturismu n’España qu’ufierta esperiencies sostenibles que contribuyen al desenvolvimientu local y al caltenimientu de la biodiversidá n’espacios protexíos.
Nesti sentíu, Blanco indicó que’l Gobiernu d’Asturies trabaya nun programa de formación pal sector empobináu a la sostenibilidá, que tien como oxetivu l’adhesión a él de les empreses venceyaes a les siete reserves de la biosfera asturianes. L’ecoturismu ta identificáu como ún de los productos prioritarios na Estratexa de Turismu 2020-2030.
Amás, la viceconseyera anunció la celebración n’Asturies, el próximu añu, d’un foru de ecoturismu, amás de la creación de la Mesa de Ecoturismu, un espaciu de trabayu con representación de tolos axentes con competencies nesti ámbitu.
Nel marcu del alcuerdu, suscritu n’El Campu, tuvo llugar una xornada formativa de sensibilización colos empresarios del Parque Natural de Redes nel centru d’interpretación del espaciu protexíu.
Fuente: Nota de prensa Gobiernu d’Asturies