El Principáu convoca ayudes pa entidaes del ámbitu forestal destinaes a fortalecer el sector y favorecer el desenvolvimientu sostenible

La Conseyería de Mediu Rural y Cohesión Territorial publicó la convocatoria d’ayudes pa entidaes del ámbitu forestal destinaes a fortalecer el sector y favorecer el desenvolvimientu sostenible. La llinia de subvenciones ta dotada con 60.000 euros y destínase a cubrir gastos d’actividá, formación, cursos y campañes de divulgación.

Estos fondos contribúin a fomentar valores como l’asociacionismu dientro del texíu social forestal, la puesta en valor d’esperiencies o l’agrupación de vendedores. Pa ello, divídense en dos llinies:

•Llinia destinada a actuaciones pal fomentu y estensión forestal. Cunta con un presupuestu de 40.000 euros y sofita actividaes estratéxiques d’acompañamientu a los oxetivos prioritarios del Principáu, como la organización de campañes técniques o demostratives y de xornaes de divulgación, ente otres.

•Llinia pal restu d’actividaes, ente les que s’inclúi financiamientu pa publicaciones, pa cuotes de suscripción a les mesmes o les abonaes por pertenencia a asociaciones nacionales ya internacionales; mesmo que los gastos propios del funcionamientu de les asociaciones. Ta dotada con 20.000 euros.

Les ayudes cunten con financiamientu del Fondu Européu Agrícola de Desenvolvimientu Rural (Feader) y el plazu pa la presentación de les solicitúes remata’l 31 d’ochobre.

El sector forestal supón casi’l 4% del productu interior brutu (PIB) rexonal y xenera unos ingresos añales a los propietarios de más de 70 millones.

Fonte: Gobirnu del Principau d’Asturies

Deja una respuesta

Tu dirección de correo electrónico no será publicada.

diecisiete − 11 =