El Principáu aspira a captar 24 millones de fondos europeos na segunda convocatoria estraordinaria de los planes de sostenibilidá turística en destín

  • Asturies entra a formar parte de la comisión executiva del Conseyu de Turismu d’España como representante de les comunidaes autónomes
  • Más d’un centenar d’empreses del sector van beneficiase de 6,6 millones pa proyectos d’eficiencia enerxética

El Principáu aspira a captar 24 millones de fondos europeos p’avanzar na tresformación de los destinos turísticos escontra un modelu basáu na sostenibilidá medioambiental, socioeconómica y territorial.

La conseyera de Cultura, Política Llingüística y Turismu, Berta Piñán, participó esta tarde na xunta del plenu de la Conferencia Sectorial de Turismu. N’alcuentru, el Gobiernu d’España alcordó coles comunidaes una inversión global de 720 millones nel marcu de la segunda convocatoria estraordinaria de los planes de sostenibilidá turística en destín, financiada colos fondos de recuperación Next Generation.

Pa optar a estos fondos, les autonomíes y entidaes locales van poder presentar los sos proyectos énte’l Ministeriu d’Industria, Comerciu y Turismu dende’l 1 d’abril hasta’l 17 de mayu.

Na convocatoria del 2021 llograron financiamientu pa desenvolver estos planes Xixón, Teberga, Cangas del Narcea, Llanes, la comarca de los Ozcos y la Comarca de la Sidra.

Otra manera, n’alcuentru aprobóse la renovación de la comisión executiva del Conseyu de Turismu d’España (Conestur), de la que’l Principáu va formar parte, xunto a Baleares, como representante de les comunidaes. Conestur ye un órganu colexáu, asesor y consultivu, adscritu al Ministeriu d’Industria, Comerciu y Turismu, onde tán presentes alministraciones públiques, representantes de la CEOE, de les Cámares de Comerciu, de les organizaciones sindicales y profesionales de prestixu reconocíu de dellos ámbitos.
Eficiencia enerxética

El plenu de la conferencia sectorial tamién aprobó una dotación de 6,6 millones pal Principáu, destinaos a financiar proyectos d’eficiencia enerxética y economía circular n’empreses turístiques. Los fondos, procedentes del Plan de Recuperación, Tresformación y Resiliencia, van dexar que 102 establecimientos anueven y ameyoren el so rindimientu enerxéticu y amenorguen el so consumu.

La Conseyería de Cultura, Política Llingüística y Turismu va llanzar la convocatoria, de la que van poder beneficiase hoteles, campings, agospedamientos turísticos y de turismu rural.

Les actuaciones subvencionables han empobinase a la meyora de la eficiencia enerxética de la envolvente térmica, l’usu d’anovables nes instalaciones térmiques de calefacción, refrixeración, climatización y agua caliente sanitario, y la optimización de les instalaciones d’illuminación. Les obres subvencionaes van tener que consiguir y xustificar una mengua del consumu d’enerxía primario non anovable del 30 % al respective de la situación de partida.

Deja una respuesta

Tu dirección de correo electrónico no será publicada.

catorce − 5 =