El Gobiernu d’Asturies, EDP y Efibat impulsen un proyectu pilotu a nivel nacional pa fomentar la movilidá eléctrica

  • La iniciativa consiste na instalación de cinco puntos de recarga de vehículos con tecnoloxía pal pagu ensin contactu con tarxeta o móvil
  • El Principáu va acoyer les primeres pruebes pal desenvolvimientu d’un gran corredor eléctricu internacional que prevé implantar un millar d’allugamientos n’España, Portugal y Francia
  • El conseyeru d’Industria destaca que l’alcuerdu contribuye a la descarbonización y a fortalecer la cadena de valor asociada a la movilidá sostenible y eficiente

El Gobiernu del Principáu, al traviés de la Fundación Asturiana de la Enerxía (Faen), lidera xunto con EDP y la empresa xixonesa Efibat un proyectu pilotu a nivel nacional pa promover la movilidá eléctrica que va dexar instalar los cinco primeros puntos de recarga del país que van ser d’accesu públicu pa vehículos eléctricos y nos que va poder realizase’l pagu por mediu de tarxeta bancaria o del teléfonu móvil.

La incorporación del sistema contactless, o pagu ensin contactu, representa una innovación especialmente relevante n’ámbitu de la movilidá eléctrica, porque dada la variedá d’operadores de puntos de recarga, los conductores vense obligaos a cuntar con distintos medios d’abonu o cuentes d’usuariu nes aplicaciones móviles de cada provisor.

Esta actuación enmárcase nun proyectu más ampliu nel que participen el Gobiernu d’Asturies y un grupu d’empreses formáu por MasterCard, Banco Sabadell, EDP y Efibat pa la puesta marcha d’un gran corredor eléctricu n’España, Portugal y Francia cola instalación d’hasta un millar de puntos de recarga pa esti tipu de vehículos. Con esta iniciativa, el Principáu va ser la primer comunidá que cunte colos equipos nuevos de recarga con tecnoloxía contactless.

El conseyeru d’Industria, Empléu y Promoción Económica, Enrique Fernández, en calidá de presidente del patronatu de la Fundación Faen, soscribió güei de forma telemática’l conveniu pa desenvolver esti proyectu, xunto con Javier Martínez, director de Movilidá Eléctrica d’EDP, y Cipriano Fernández, alministrador únicu de Efibat. La iniciativa nació de la mesa rexonal pal fomentu de la movilidá eléctrica n’Asturies y vinculada a la Estratexa de Transición Enerxética Xusta.

Al amparu del conveniu, Faen va entregar 30.000 euros pa la instalación de los puntos de recarga y pa llograr información detallada del usu de les infraestructures, lo que va dexar afaer y ameyorar la esperiencia de los usuarios.

Mientres la firma, Fernández destacó que’l proyectu ye frutu de la collaboración públicu-privada y representa una iniciativa singular dientro de la estratexa del Executivu pa promover la movilidá eléctrica y sostenible. Resaltó, amás, la fortaleza de socios como EDP, como operador y xestor de los puntos de recarga, y de la empresa Efibat, que va encargase de la fabricación de les infraestructures.

“Tamos énte un proyectu pilotu que favorez la sostenibilidá enerxética al introducir una movilidá basada en fontes anovables y non fósiles. Implica tamién sostenibilidá medioambiental y económica, yá que xenera actividá y empléu, teniendo en cuenta que s’enmarca nuna iniciativa más amplia que va desenvolvese a nivel internacional”, aseguró’l conseyeru.

“El nuestru oxetivu ye siguir nesta llinia de collaboración ente empreses y alministraciones que tan bonos resultaos ta dando y que pretendemos intensificar, favoreciendo’l cumplimientu de los oxetivos de progresiva descarbonización de la economía nel procesu de transición enerxética xusta, y impulsando, asina mesmo, la cadena de valor y l’actividá productivu d’empreses asturianes como provisores d’equipos y tecnoloxíes asociaes a la movilidá sostenible”, añedió.

Deja una respuesta

Tu dirección de correo electrónico no será publicada.

cinco × 1 =