- Varios centros del ERA recibieron llamaes sobre una supuesta inspección sanitaria
- La xerente advierte de que “son actuaciones ilícites y engañoses de les que los responsables de los equipamientos deben tar al tanto”
El Gobiernu d’Asturies avisa d’un nuevu intentu d’estafa rexistráu nos últimos díes nes residencies de mayores, el cuartu dende l’entamu de la pandemia. L’organismu autónomu Establecimientos Residenciales p’Ancianos (ERA) tien constancies de llamaes engañoses nel CPR El Nodo, n’Avilés, y La Vega, en Mieres.
En dambos casos, los estafadores anunciaron una supuesta inspección sanitaria por un protocolu de seguridá nuevu, pero les sos referencies fueron esplícitamente incorrectes, yá que nomaron instituciones y organismos inexistentes. Los responsables de los centros afectaos informaron de momentu a la xerencia del ERA.
La Conseyería de Derechos Sociales y Bienestar alvierte de qu’esti tipu de comunicaciones nunca son oficiales y aconseya que se denuncien siempre. “Trátase d’actuaciones ilícites y engañoses de les que responsables de los centros tienen de tar al tanto”, afirmó Ana Suárez, xerente del ERA, quien estimó a los centros la so profesionalidá y rápida respuesta énte estos nuevos intentos d’estafa.
N’ochobre de 2020, delles residencies yá recibieron llamaes asemyaes pa solicitar un pagu por material sanitariu, supuestamente del ministeriu. Esos intentos repitiéronse a principios del añu pasáu. “Ye importante dar a conocer estos casos a tola rede, tanto la pública como la privada, pa evitar que los estafadores consigan el so propósitu”, alvirtió Suárez.