• 29 de marzo de 2024 12:11

Cultura pon en marcha’l proyectu Pegoyu, almacén d’horros pa facilitar el caltenimientu y restauración d’elementos etnográficos

  • Patrimoniu xestiona la recuperación de pieces pa la so reutilización na rehabilitación d’horros y paneres, cola collaboración de la Fundación Cetemas y Amigos del Horru


La conseyera de Cultura, Política Llingüística y Turismu, Berta Piñán, visitó güei en Siero les instalaciones del Centru Tecnolóxicu Forestal y de la Madera (Cetemas), qu’alluguen pieces etnográfiques procedentes de desmontaxes realizaos de resultes de declaraciones de ruina pa ponelos de forma gratuita a disposición de los interesaos n’aprovechales na restauración d’elementos de naturaleza similar. El proyectu denomináu Pegoyu, almacén d’horros busca facilitar el caltenimientu y restauración d’horros y paneres.

Piñán, que tuvo acompañada pol alcalde de Siero, Ángel García, esplicó que na actualidá hai almacenaes pieces d’ocho horros y paneres de siete conceyos, que fueron desmontaos por ruina nel 2021, previu informe del Conseyu del Patrimoniu Cultural. Tres la recepción y el tratamientu de la madera nel Cetemas, nel inventariu figuren colondres, engüelgos, pegollos, tables, mueles, vigues, moños, trabes, lliños o sobrelliños, pa restauraciones potenciales.

Patrimoniu va siguir xestionando anguaño los llabores de recoyida de pieces d’horros y paneres en mal estáu y va habilitar un sistema de solicitú d’estos elementos etnográficos pa la so reutilización en restauraciones.

El procesu de recuperación

La Dirección Xeneral de Patrimoniu estableció l’añu pasáu 8 actuaciones de desmontaxe, qu’Amigos del Horru (AAHA) realizó nos conceyos d’Illas, Mieres, Ayer, Carreño, Piloña, Candamu y Grau. Nesti últimu conceyu lleváronse a cabu dos intervenciones.

Amigos del Horru encárgase de llevar a cabu les trés primeres fases del procesu:

  • El desmontaje de 7 horros y paneres en ruina, la intervención nun derrumbre parcial y la retirada d’escombros.
  • El tresporte y el treslláu de les pieces rescataes a la sede de Cetemas, asina como la ellaboración d’un informe técnicu sobre la operación realizada, los materiales recoyíos y la so valoración, y les midíes aconseyaes pal so caltenimientu.
  • La presentación d’un protocolu con fluxogrames, llabores y documentación del procesu, ellaboráu en collaboración cola conseyería, los conceyos y los propietarios.

Pa estes actuaciones, el serviciu de Patrimoniu y la AAHA analizaron los espedientes de los elementos afectaos, realizaron visites previes y valoraron a comuña les condiciones de les intervenciones, los materiales y les necesidaes relatives a los trabayos y la maquinaria. La entrega a Cetemas de les pieces rescataes realizóse’l mesmu día de la so recoyida.

El caltenimientu de la madera

Tres la recepción de los materiales rescataos, la Fundación Cetemas asume la siguiente fase del procesu. Asina, mientres 2021 habilitó l’espaciu físicu pal almacenamientu de les pieces y empecipió la ellaboración d’un inventariu. Pal allugamientu del almacén analizaron les condiciones ambientales del espaciu. El mugor relativo y la temperatura son factores esenciales pal caltenimientu de la madera, sobre manera nel casu d’estes pieces patrimoniales d’altu valor.

Asina mesmo, Cetemas evaluó les distintes técniques emplegaes pa la caracterización non destructiva de la madera pa, a lo último, definir los protocolos de midida, toma de datos y cálculu de propiedaes que s’apliquen a los materiales. El protocolu de recepción de les pieces tien cuatro fases:

  • Descarga, etiquetáu individual y llimpieza mediante agua a presión pa esaniciar elementos estraños.
  • Ensugáu n’esterior hasta la retirada del mugor superficial.
  • Aplicación del productu superficial protector anti-carcoma y posterior ensugáu al aire.
  • Apiláu, flexáu y allugamientu nel almacén interior de pieces susceptibles (tables y colondres), enrastreláu y allugamientu de pieces de gran tamañu nel esterior (trabes, pegollos o mueles).

Cultura financió nel 2021 con 25.000 euros el procesu de recuperación de los elementos etnográficos: 10.000 euros destínense al desmontaxe y rescate de les pieces que realiza Amigos del Horru y 15.000 al tratamientu y almacenaxe, al cargu de Cetemas. Dambes subvenciones anuévense anguaño.

Mesa del Horru

Pegoyu, almacén d’horros ye una iniciativa promovida nel senu de la Mesa del Horru, constituyida pola Conseyería de Cultura en febreru del 2020 pa encarar los aspectos esenciales na xestión patrimonial de los horros, garantizar el so futuru y salvaguardar el so valor cultural. Esti órganu ta integráu por espertos, profesionales y representantes d’entidaes de distintos ámbitos rellacionaos en so estudiu, la restauración y el caltenimientu d’esti patrimoniu etnográficu. Ente ellos, miembros de la Fundación Cetemas y de los Amigos del Horru.

De resultes de los trabayos desenvueltos pola Mesa del Horru configuróse la primer base de datos unificada sobre 14.566 horros, paneres y cabazos protexíos n’Asturies. Amás, l’organismu patrimonial ultima’l debate pal cambéu normativu que regula l’horru y que se plantega usos nuevos, cola mira de favorecer la so reutilización y la so utilidá, calteniendo’l so valor cultural.

Ayudes pa obres de restauración

La Conseyería de Cultura, d’otra manera, va destinar anguaño 300.000 euros a les ayudes pa la restauración d’horros y paneres. Esta convocatoria, publicada la selmana pasada, destínase a particulares y instituciones ensin ánimu d’arriquecimientu que vaigan realizar obres de caltenimientu, restauración o rehabilitación.

Patrimoniu triplicó la cantidá destinada a esti tipu d’ayudes dende’l 2018, en que se presupuestaron 100.000 euros, y dóblase al respective del 2021, añu nel que concovó subvenciones por 150.000 euros.

Deja una respuesta

Tu dirección de correo electrónico no será publicada. Los campos obligatorios están marcados con *

quince − 11 =

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies