- Esta llinia de subvenciones enmárcase nel Plan de Recuperación, Tresformamientu y Resiliencia
La Conseyería de Cultura, Política Llingüística y Turismu convoca la primer de les sos llinies de subvenciones con cargu al mecanismu européu de recuperación, nel marcu del Plan de Recuperación, Tresformamientu y Resiliencia. Les ayudes, dotaes con 424.809 euros, tán destinaes a la modernización y xestión sostenible de les infraestructures d’artes escéniques y musicales.
Concretamente, esta llinia destínase a equipamientos xestionaos por particulares, empreses, entidaes locales y fundaciones o organismos públicos autonómicos con personalidá xurídica propia. Les ayudes son pa inversiones dedicaes a la modernización dixital, la transición verde y el tresformamientu de los espacios escénicos y musicales, cola mira de fomentar una xestión intelixente y sostenible.
Ente otres, cubren actuaciones destinaes a la eficacia enerxética, la modernización de sistemes dixitales d’audiu y comunicaciones en rede, l’actualización de los sistemes d’iluminación y videu dixitales, lo mesmo que de la maquinaria escénica y les ferramientes y sistemes electrónicos de xestión artística y producción d’espectáculos nos espacios escénicos y musicales.
El plazu pa solicitar les ayudes, que la so convocatoria publícase güei nel Boletín Oficial del Principáu d’Asturies (BOPA), ye de 20 díes hábiles a partir del 24 de xineru próximu.