Consumu retiró del mercáu l’añu pasáu 71.744 artículos inseguros, de los que 57.612 yeren mázcares

  • En 2021 tramitáronse 1.792 reclamaciones, la mayoría d’operadores de telefonía, comerciu minorista, banca, seguros y servicios sanitarios privaos
  • Güei celébrase’l Día Mundial de los Derechos de les Persones Consumidores  coles mires d’esixir la so protección frente a los abusos y concienciar a la ciudadanía

L’Axencia de Seguridá Alimentaria, Sanidá Ambiental y Consumu retiró del mercáu l’añu pasáu 71.774 artículos inseguros, de los que 57.612 yeren mázcares que nun cumplíen colos preceptivos requisitos. Esti órganu, dependiente de la Conseyería de Salú, realizó 2.871 inspecciones na so función de defensa de los derechos de la ciudadanía.

Nel actual contestu de pandemia, l’axencia exerz un control permanente sobre los mázcares pa verificar aspectos como l’etiquetáu, la veracidá de les característiques espublizaes, la documentación y acreditaciones técniques y les restantes esixencies llegales que tienen de cumplir estos productos, tanto n’establecimientos comerciales como na so venta per internet.

Per otra parte, a lo llargo del añu pasáu atendió 1.919 consultes y tramitó 1.792 reclamaciones, de les que 733 fueron treslladaes a otros organismos competentes. La mesma axencia xestionó’l restu de les quexes (1.059), que dieron llugar a la incoación de 127 espedientes sancionadores. 

De les reclamaciones tramitaes, 420 fueron solicitúes d’arbitraxe de consumu, un sistema estraxudicial de resoución de conflictos, voluntariu y gratuitu pa les partes, nel qu’empresa y veceru comprométense a aceptar la resolución que se dicte, y que se caracteriza pola so rapidez. Anguaño, 1.350 empreses tán axuntaes a esta fórmula arbitral.

Les telecomunicaciones, con 508 quexes (28%), tienen el mayor númberu de reclamaciones, siguíes pol comerciu minorista, con 264 (15%); los servicios financieros y seguros, con 111 (6,2%); los servicios sanitarios privaos, con 107 (6%), y la venta y arreglu de vehículos, con 105 (5,9%). Tamién fueron oxetu de reclamaciones les actividaes turístiques (91), el comerciu electrónicu (88), los suministros domésticos (78) y el tresporte aéreu (51).

Comerciu electrónicu

El comerciu electrónicu esperimentó nos últimos años un fuerte crecimiento, acentuáu poles llimitaciones impuestes a la movilidá como midida sanitaria pa facer frente a la pandemia. Énte la medra de les reclamaciones rellacionaes con esti sector, el Principáu encamienta verificar la seguridá de les páxines de compra, comprobando que la barra de direcciones empiece por https://, cola “s” de seguridá, o que tenga’l símbolu del candáu o llave a pie de páxina. 

Consumu aconseya tamién resabiar d’ufiertes imposibles y consultar les opiniones d’otros usuarios sobre los vendedores, ensin escaecer que al mercar per internet disponse de 14 díes pa exercer el derechu de desistimientu, que permite devolver aquello que s’adquirió ensin penalización dalguna.

Ampliación de la garantía llegal

Dende’l 1 de xineru de 2022 amplíase la garantía de los productos nuevos a 3 años. Énte estos cambeos, l’axencia publicó un trípticu con información a disposición del públicu nel portal wwww.consumoastur.es: http://cfc-asturias.es/uploads/material/fichero/470/triptico_garantia.pdf

Control y vixilancia de los productos

L’axencia tamién lleva a cabu xuna llabor preventivu de control y vixilancia de productos pa evitar fraudes o riesgos rellacionaos cola salú y la seguridá. Con esi fin, impulsa campañes nes que se tomen muestre y analízase l’etiquetáu y la composición de los artículos, de la que xestiona la rede d’alertes de productos peligrosos.

En 2021 desenvolviéronse 11 campañes de control de mercáu, tanto de productos industriales como d’alimentos, nes que se detectaron irregularidaes nel etiquetáu, na calidá de los alimentos y na seguridá de xuguetes, electrodomésticos pequeños y otros artículos de consumu.

Esti control complétase cola rede d’alertes, al traviés de la cual recibiéronse 2.769 notificaciones de productos inseguros, el 57,66% de los cualos tenía’l so orixe en países asiáticos. 

Por tipoloxía, xuguetes, vehículos, productos eléctricos, mázcares y otros equipos de protección individual y la moda (testil y complementos), tanto d’adultos como infantil, fueron los productos que más alertes aniciaron.

L’añu pasáu emitiéronser n’Asturies 9 notificaciones na rede d’alerta: 5 sobre electrodomésticos pequenos, 3 sobre xuguetes y ún de cosméticos.

Consumu responsable y sostenible

Güei conmemórase’l Día Mundial de les Persones Consumidores coles mires de promover y espublizar derechos y esixir la so protección y respetu frente a los abusos, según pa concenciar a la ciudadanía. 

El lema d’esti añu, Tas curiando’l planeta y quiciabes nun lo sabes, pretende informar sobre cómo ameyorar los vezos p’avanzar hacia un consumu más responsable y sostenible. Nesti contestu, danse comportamientos sostenibles bien cotidianos, qu’ayuden a protexer el planeta, y que gran parte de la población yá adquirió, anque non siempre de manera consciente. Trátase, por casu, de nun dexar nunca aparatos eléctricos en reposu (stand by), cerrar el grifu cuando nun s’usa l’agua, aprovechar la comida sobrante, etcétera.

El Principáu cunta cola Rede de Centros de Formación pal Consumu (www.cfc-asturias.es), pionera n’Europa, que favorez la educación y concienciación ciudadana. El pasáu añu, 12.272 persones participaron nes actividaes ufiertaes, lo qu’implica una importante recuperación de l’actividá tres les llimitaciones impuestes pola covid.

Amás, na última edición del Concursu Consumópolis, acción promovida pol Ministeriu de Consumu en collaboración coles comunidaes autónomes, Asturies llogró dos de los trés premios nacionales gracies al trabayu de los equipos Sestras y Scorpion, del IES de L’Infiestu. 

Deja una respuesta

Tu dirección de correo electrónico no será publicada.

6 + 1 =