Asturies va destinar anguaño 4,5 millones a los conceyos pa polítiques de conciliación y corresponsabilidad

  • La Dirección Xeneral d’Igualdá tamién va dedicar 1.100.000 euros a ayudes directes pa families con menores de 14 años

El Gobiernu d’Asturies, al traviés de la Dirección Xeneral d’Igualdá, va destinar anguaño 4,5 millones a los conceyos pa polítiques de conciliación y corresponsabilidá. Estos fondos enmárquense nel Plan Asturianu de Corresponsabilidá, cofinanciáu pol Ministeriu d’Igualdá y ún de los proyectos más ambiciosos del Principáu pa favorecer la reconstrucción de la economía post-covid con perspectiva de xéneru y evitar la salida de les muyeres del mercáu llaboral tres l’impactu de la pandemia.

El plan cuntó con un presupuestu de 5,5 millones l’añu pasáu, de los cualos 3 tresfiriéronse a los conceyos pa el desenvolvimientu de polítiques de cuidaos y corresponsabilidá. Esti añu, los conceyos van recibir 1,5 millones más y van dedicase otros 1.100.000 euros a ayudes directes pa sofitar a families con fíos y fíes menores de 14 años na conciliación de la vida personal y llaboral.

“Les muyeres son les primeres n’acusar les crisis, en 2008 los datos fueron atayantes. Les muyeres son les primeres en ser espulsaes de los sos puestos de trabayu y les postreres en recuperalos. La pandemia de la covid-19 nun foi distinta. Azotó con desproporción a les muyeres, especialmente na sobrecarga de cuidaos”, esplicó güei la directora xeneral d’Igualdá, Nuria Varela.

La titular d’Igualdá ufiertó una rueda de prensa xunto cola coordinadora d’Economía n’Igualdá, Carmen Castro, con motivu del Día Européu de la Igualdá Salarial, que se celebra’l 22 de febreru. Na so comparecencia, Varela repasó les iniciatives impulsaes pol Gobiernu d’Asturies pa construyir la estratexa contra la desigualdá económica.

Según indicó, esa estratexa sostiense  sobre dos pilares “novedosos y bien dotaos económicamente”: la figura d’axentes delegaos y delegaes d’igualdá na empresa y el Plan Asturianu de Corresponsabilidá. Dambes polítiques tienen por oxetivu tanto amenorgar la fienda salarial, que baxó 5 puntos nel últimu añu, como evitar que tol llabor de los cuidaos recaya sobre les muyeres.

Los delegaos y delegaes n’igualdá na empresa son una figura financiada íntegramente pola Dirección Xeneral d’Igualdá con 174.000 euros en 2022. Esta midida ye frutu de la negociación colos axentes económicos y sociales na Mesa d’Igualdá, prevista nel alcuerdu de concertación social per primer vez en 32 años.

Los delegaos y delegaes n’igualdá na empresa empecipiaron la so actividá l’añu pasáu con visites a 58 empreses del sector servicios. D’eses inspecciones despréndense yá dellos datos: el 53% de les compañíes contaba con un rexistru retributivu, el 35% taba en procesu de negociación d’un plan d’igualdá, el 82% entá nun aprobara esi plan y el 28% nun contaba con protocolu de prevención d’acosu sexual.

Otra de les actuaciones impulsaes en 2021 foi’l tresformamientu de l’antigua escuela d’entamadores y empresaries d’Avilés nel Centru d’Innovación y Economía n’Igualdá.

Dellos datos relevantes

L’aumentu salarial de les muyeres n’Asturies en 2019 fai que, prácticamente, s’oldee’l  promediu salarial español pa esti sexu, una circunstancia que nun se daba dende 2009. El salariu mediu de les muyeres n’España ye de 21.682 euros añales y el de les asturianes de 21.298,6. Estes cifres muestren que diez años deçués, zarróse la fienda abierta al entamu de la crisis de 2008 ente los sueldos de les asturianes y los del restu de les españoles. Sicasí, los salarios de los homes asturianos tán percima de la media nacional pal so sexu (1.547,37 euros de diferencia). Los asturianos cobren de media 28.481,75 euros al añu y los españoles, de media, 26.934,38.

Los últimos datos oficiales correspondientes a 2019, reflexen una fienda salarial, midida en salariu brutu por hora de trabayu, del 15,89%, y en salariu brutu añal, del 25,2%. Sicasí, en compación col añu anterior, confírmase un amenorgamientu na fienda salarial de 5 puntos nel salariu brutu por hora de trabayu, qu’en 2018 asítiase nel 20,96%.

En 2021 ameyoraron toles tases referentes al trabayu de les muyeres: les d’actividá y empléu aumentaron y menguó la de desempléu.

 Otros datos d’interés sobre la situación n’Asturies son los siguientes:

  • El trabayu a tiempu parcial ta feminizáu: prácticamente’l 79% de les persones con un empléu a tiempu parcial n’Asturies son muyeres.
  • Los salarios de los trabayadores asturianos superen a los de los españoles, independientemente del so nivel d’ocupación. La fienda salarial de xéneru asturiana ye más baxa que la nacional namás nes ocupaciones de nivel altu. La diferencia ye mayor cuanto menor ye’l nivel del empléu, de forma que n’ocupaciones de nivel baxu, les muyeres lleguen a ganar 4,9 euros menos por hora trabayada que los homes.
  • La pensión media de los homes n’Asturies sigue siendo la mayor d’España: 4.735 euros añales más que’l promediu nacional. La fienda de xéneru nes pensiones asturianes ye del 37,1%, la segunda mayor d’España, namás per detrás de Ceuta. Nestes circunstancies, seríen necesarios 63 años pa zarrar por completo la fienda de xéneru nes pensiones n’Asturies. ​​

Deja una respuesta

Tu dirección de correo electrónico no será publicada.

19 − cinco =