Asturies remata la ellaboración d’una llei nueva de cooperatives más operativa y adaptada a la realidá del sector

• La norma, consensuada con empreses y asociaciones, va menguar de tres a dos el númberu mínimu de socios, al empar que va simplificar la tramitación .
• El testu actualiza les modalidaes societaries cola incorporación de les cooperatives d’impulsu empresarial y de desenvolvimientu rural.

El Gobiernu d’Asturies avanza na ellaboración d’una normativa autonómica nueva pa facilitar a les empreses y sociedaes cooperatives un marcu llegal adaptáu a los cambeos sociales y económicos. La redacción de la llexislación que va sustituyir a la Llei 4/2010, de 29 de xunu, de Cooperatives, ye un compromisu de llexislatura como respuesta a les necesidaes y pidimientos treslladaos pol sector a la Conseyería d’Industria, Empléu y Promoción Económica.

Nel diseñu del borrador d’anteproyectu de llei participaron tolos axentes sociales y sectoriales, amás de los sindicatos CC. OO. y UXT, xunto a una representación de los técnicos de la conseyería, pa lo que se celebraron 16 xuntes de trabayu.

Ente les novedaes previstes na norma futura destaquen estes:

•El númberu mínimu de persones socies pa formar una cooperativa mengua a dos, frente a les trés de la normativa actual. Esta mengua ye l’enclín que s’atopa na llexislación de les más de les comunidaes y va facilitar la constitución d»estes empreses, sobre manera en zones con poca población.

•Regúlase de forma más detallada la figura del sociu de trabayu, estableciendo garantíes pa les persones que la so actividá consiste na prestación del so llabor en cooperatives que nun seyan de trabayu asociáu.

•Caltiénse la cifra de 3.000 euros como capital social mínimu, anque s’almite que’l desembolsu pueda llevase a cabu de forma socesiva. Amás, restrínxese la contribución económica del sociu tocante a les aportaciones obligatories, pero nun hai tope pa les voluntaries.

•Simplifíquense dellos trámites (cambéu d’estatutos, publicación de determinaos alcuerdos, etcétera), estableciendo requisitos menos gravosos pa les sociedaes, de la que se regula la posibilidá de que les cooperatives creen una web corporativa.

•Simplifícase la documentación que se tien que presentar p’aprobar les cuentes anuales y nun va ser preceptivu l’informe de xestión.

•Modifícase la regulación de los fondos obligatorios de la cooperativa, con meyores tanto tocante a la dotación como al so destín. Amás, va dase un tratamientu homoxeneu nos supuestos de tresformación o disolución de la sociedá, polo que nun se va penalizar la tresformación.

•Al respective de los tipos de cooperatives, actualízase la denominación de les agroalimentaries (agraries na llei en vigor actualmente), modifícase la cooperativa d’esplotación comunitaria de la tierra, cola mira de dexar la esplotación de mancomún de bienes non agrarios, y regúlense tipos nuevos, como la cooperativa d’impulsu empresarial y la de desenvolvimientu rural.

•Tamién se contempla acutar la calificación de les cooperatives ensin ánimu d’arriquecimientu a aquelles sociedaes que xestionen servicios d’interés colectivu o de titularidá pública y a les que realicen actividaes educatives, sociosanitaries o otres que conduzan a la integración llaboral de les persones que sufran esclusión social.

El director xeneral de Comerciu, Emprendimientu y Economía Social, Julio González Zapico, señaló que la futura llei “cumple coles demandes del sector y va dexar un florecimientu del emprendimientu cooperativu como elementu fundamental nel marcu de la economía social”.

Asturies tien anguaño 187 sociedaes cooperatives, ente les que destaquen pola so dimensión les dedicaes al sector agroalimentariu y les de servicios y