Asturies impulsa’l texíu d’empreses innovadores de base tecnolóxica con 1,4 millones para 18 compañíes

El Gobiernu d’Asturies impulsa’l mapa d’empreses innovadores de base tecnolóxica (EIBT) con una subvención de más de 1,4 millones para 18 compañíes: 16 de nueva creación y 2 en fase d’afitamientu. La Conseyería de Ciencia, Innovación y Universidá, al traviés del Centru Européu d’Empreses ya Innovación (CEEI), quier sofitar la crecedera d’esti tipu de firmes, para lo qu’anguaño destina una partida de 1,6 millones.

Les 18 empreses beneficiaries de la última convocatoria d’ayudes presentaron los sos proyectos. Les actividaes empresariales tomen distintos ámbitos, magar son recurrentes los proyectos venceyaos a la intelixencia artificial, la digitalización d’empreses, la telemedicina y les plataformes online para tratamientos personalizaos. Destaquen tamién iniciatives rellacionaes con actividaes financieres, criptomonedas y ciberseguridad, según productos ecolóxicos para mascotes o compuestos para amenorgar emisiones en agroganadería.

El conseyeru de Ciencia, Innovación y Universidá, Borja Sánchez, destacó la importancia d’apostar poles empreses innovadores de base tecnolóxica, yá que suponen una forma de crear riqueza y empléu calidable. Tamién destacó la progresiva crecedera d’esti tipu de compañíes n’Asturies. Ello ye que nesta última convocatoria son 16 les nueves firmes, frente a les 11 impulsaes en 2020. Anguaño hai más de 220 empreses innovadores nel Principáu.

Col sofitu del Gobiernu d’Asturies punxéronse en marcha les siguientes compañíes: Activa Biotech, Aritium, Autecnia, Bettermaps, Bizcares Biosolutions, Diecolpet, Ewala it Services, iMstant Cosmeceutics, MyOmics, PibiCo, Piby, Startquake, StockFink, Uriaxait, Visión Dixital Proxectada (VDP) y Vulpe TI. Pela so parte, en fase d’afitamientu atópense Teiichi Capital Tech y Seerstems.

L’Institutu de Desenvolvimientu Económicu del Principáu (Idepa) concedió más de 7,5 millones dende 2013 para financiar 115 proyectos: 78 en fase 1 (creación y puesta en marcha) y 37 en fase 2 (afitamientu).

Nel alcuentru celebráu esta mañana, tamién intervinieron la directora del Idepa, Eva Pando; la directora del CEEI Asturies, Cristina Fanjul; el director comercial de Asturgar; Alberto Fernández; la representante de la Sociedá Rexonal de Promoción (SRP), María Antonia Iturbe; y el responsable de la área d’I+D+i Empresarial del Idepa, Jaime Fernández, qu’esplicaron distintes llínees de financiamientu y mecanismos de los que pueden beneficiase estes empreses.

Deja una respuesta

Tu dirección de correo electrónico no será publicada.

tres × dos =