Asturias, Navarra, Galicia y País Vascu analicen la creación de rebaños comunitarios d’ovinu y caprinu como ferramientas de xestión de los montes y la biodiversidá

  • El Principáu y la comunidá foral entamen una xunta pa estudiar fórmules d’organización del pastoréu alternatives y vidables

El Gobiernu d’Asturies, al traviés del comisionáu pal Retu Demográficu, xunto col Gobiernu de la Comunidá Foral de Navarra, por aciu’l so Departamentu d’Ordenación del Territoriu, Vivienda, Paisaxe y Proyectos Estratéxicos, impulsen una xornada para analizar fórmules d’organización del llendo alternatives y vidables que contribuyan a la xestión de los montes y la biodiversidá.

D’esta miente, dambes comunidaes entamaron l’alcuentru Rebaños conceyiles, comuñales o cooperativos pa la xestión del monte y la biodiversidá, nel que tamién van participar representantes de Galicia y País Vascu.

L’oxetivu de la iniciativa pasa por aldericar sobre un nuevu impulsu a la xestión del monte per mediu del pastoréu de pequeños rumiantes (cabres y/o oveyes). Esti sistema, amás de producir carne, lleche y quesos d’alta calidá, contribúi a la creación de paisaxe y a garantizar la diversidá y una xestión óptima de los agroecosistemes históricos venceyaos al pastoréu de monte que s’atopen en peligru d’estinción por abandonu y asilvestramientu.

Asina, los responsables de les cuatro comunidaes van avanzar na posibilidá de crear estos rebaños y plantegar pasos ya itinerarios pa la so implantación de manera esperimental.

La xunta va celebrase mañana, xueves, en Burguete (Navarra). La delegación asturiana va tar formada pol comisionáu pal Retu Demográficu, Jaime Izquierdo; la directora xeneral de Ganadería y Sanidá Animal, Rocío Huerta; el director de la Fundación Centro Tecnolóxicu de la Información y la Comunicación (CTIC), Pablo Priesca, y personal del Serviciu Rexonal d’Investigación y Desenvolvimientu Agroalimentario (Serida).

Deja una respuesta

Tu dirección de correo electrónico no será publicada.

diecinueve − nueve =