Salú empecipia güei l’aislamientu de 7 díes a los casos positivos de covid tres l’actualización de la estratexa de detección y control

• La cuarentena va concluyir cuando, al cumplise una selmana, pelo menos nes trés últimes xornaes la persona afectada nun presentó síntomes de la enfermedá.
• Si se dan estes condiciones, el final del confinamientu nun va precisar d’una prueba diagnóstica.

La Conseyería de Salú empieza a aplicar güei el protocolu nuevu nel manexu de los casos de coronavirus y los contactos estrechos, tal que s’establez na actualización de la Estratexa de detección precoz, vixilancia y control de covid-19, que da prioridá a les actuaciones de prevención y siguimientu nun escenariu de circulación elevada del virus. D’esta manera, una persona con covida va aislase mientres 7 díes y va rematar la cuarentena si pelo menos nos 3 últimos nun presenta síntomes. Amás, si se dan estes condiciones, nun va precisar prueba diagnóstica pa concluyir el confinamientu.

Cuando una persona sía confirmada como casu positivu de covid, el Serviciu de Salú del Principáu (Sespa) va manda-y un mensaxe de testu (SMS) nun plazu de 24/48 hores. Darréu, un equipu de rastrexu y d’atención primaria va contactar con ella pa la so valoración y siguimientu.

Si la persona afectada nun tien síntomes o si estos manifiéstense de forma leve, nun ye menester que se ponga en contactu col so centru de salú, nin siquier pa pidir la baxa llaboral. Nesi supuestu, llamaránlu para valorar la situación clínica y va tramitase la baxa cuando resulte precisu. Si’l so estáu empiora, entós sí tendrá de ponese en contactu col centru de salú.

Manexu de contactos estrechos

La identificación de contactos estrechos namás va realizase nos ámbitos nos que la esposición se considere de riesgu altu pola presencia de persones con mayor vulnerabilidá, por exemplu, en centros sanitarios y residencies de mayores o otros centros sociosanitarios.

Los contactos estrechos que cunten con pauta completa de vacunación van tar exentos de cuarentena, coles escepciones recoyíes na mesma estratexa de detección y control. Pela so parte, pa los ensin vacunar l’aislamientu va durar 7 díes, siempre y cuando nun desenvuelvan síntomes mientres esti periodu. Amás, nos 3 díes siguientes habrán estremar les midíes de protección, como por exemplu, l’usu rigorosu de mázcara y la llimitación de contactos a los imprescindibles, ente más otres.

Otra manera, a los contactos con síntomes de la enfermedá encamiéntase-yos doblar el precuru y acutar la vida social. Amás, han pidir una prueba diagnóstica al traviés de la web Astursalud.

Les autoridaes sanitaries sorrayen la necesidá de cumplir coles midíes de protección, sobre manera l’usu de mázcara y el precuru n’espacios interiores con distancia, control d’aforos, ventilación y vixilancia de síntomes.

Salú tamién aconseya la vacunación contra la covid a toles persones qu’entá nun la recibieron, mesmo que la profilaxis de recuerdu a la población pa la que ta indicada, sobre manera a los mayores de 40 años. Tamién encamienta evitar situaciones de riesgu, sobre manera espacios mal ventilados ensin mázcara.