Promuevese un conveniu pa fomentar y garantizar el turismu accesible ya inclusivu n’Asturies

• L’Executivu destina 30.000 euros a un alcuerdu con Cocemfe que va establecer cinco rutes d’accesu universal, trés en ciudaes y dos na zona rural .

El Gobiernu d’Asturies y la Confederación de Persones con Discapacidá Física y Orgánica del Principáu (Cocemfe) roblaron güei un conveniu de collaboración col que se van crear cinco rutes d’accesu universal y que supón un pasu importante nel allugamientu del Principáu como destín turísticu accesible ya inclusivu.

En virtú del alcuerdu promovíu pola Conseyería de Cultura, Política Llingüística y Turismu, al traviés de la Sociedá Pública de Xestión y Promoción Turística y Cultural, el Principáu va destinar 30.000 euros a la promoción del turismu inclusivu, una collaboración que naz coles mires de caltenese al llargu plazu.

El conveniu contempla’l desenvolvimientu, per parte del equipu técnicu de Cocemfe, de les cinco rutes d’accesu universal pol territoriu para consolidar Asturies como un destín turísticu accesible. La viceconseyera de Turismu, Graciela Blanco, adelantró nel actu de la firma qu’estes rutes, “una vegada auditaes y comprobaos los servicios y el grau d’accesibilidá”, van dar opciones para visitar Avilés, Xixón y Uviéu y dos enclaves de la zona rural.

Blanco señaló que, amás del sofitu económicu, el Principáu comprométese a crear una guía turística dixital qu’esplique y detalle los itinerarios y a incorporar la información a les canales del portal d’internet TurismoAsturias y a les redes sociales.

La viceconseyera enmarcó esta actuación na estratexa de Turismu del Principáu 2020-2030, que’l so oxetivu ye liderar el desenvolvimientu del turismu sostenible ya inclusivu na comunidá autónoma. Coles mesmes, manifestó que “la voluntá ye arreyar a les empreses por mediu d’una ufierta d’establecimientos turísticos accesibles y una formación específica de los profesionales nesti ámbitu qu’abonde nuna ventaya competitiva p’Asturies y el so texíu empresarial”.

L’alcuerdu de collaboración ente Turismu y Cocemfe tien como finalidá la promoción d’un turismu inclusivu que garantice la igualdá d’oportunidaes pa desenvolver esta actividá d’una manera segura, cómoda y autónoma, y procurar el máximu beneficiu pa los turistes con diversidá funcional.