Mediu Ambiente contrata un estudiu sobre l’impactu del cambéu climáticu n’actividades estratéxiques y na vida cotidiana

• L’ análisis, al que se destinen 41.700 euros, va permitir algamar un conocimientu más precisu de les consecuencies de la variación del clima

La Conseyería d’Alministración Autonómica, Mediu Ambiente y Cambéu Climáticu axudicó en 41.700 euros un contratu pal analís del impactu del cambéu climáticu sobre los sistemes ambientales y socioeconómicos n’Asturies. L’informe va tener un plazu d’execución de diez meses.

L’estudiu va dexar avanzar escontra una conocencia más precisa de les consecuencies que va tener la variación del clima en servicios ambientales esenciales na vida cotidiana, como la disponibilidá d’agua, la regulación de la calidá del aire o la polinización. Coles mesmes, van evaluase los impactos sobre actividaes estratéxiques espuestes a mediu y llargu plazu, como’l sector agroalimentariu, la silvicultura, la producción d’enerxía o’l turismu.

La Viceconseyería de Mediu Ambiente y Cambéu Climáticu, promotora de la investigación, adelántase d’esta manera al trabayu que se va desenvolver dientro de la Estratexa Asturiana d’Acción pol Clima, agora n’ellaboración, y que va tar rematada esti añu..