Los llabradores y ganaderos asturianos van poder solicitar conxuntamente per primer vez el pagu únicu y les ayudes d’incorporación a l’actividá

• El Principáu y el Fondu Español de Garantía Agraria refuercen la collaboración pa entainar la xestión de la PAC
• La campaña del 2022 va superar los 105 millones y les entidaes collaboradores yá puen realizar la precarga de los datos para les solicitúes

El conseyeru de Mediu Rural y Cohesión Territorial, Alejandro Calvo, y el presidente del Fondu Español de Garantía Agraria (FEGA), Miguel Ángel Riesgo, reuniéronse pa encarar les novedaes de la campaña de la Política Agraria Común (PAC). Nel alcuentru tamién participaron la directora xeneral de Ganadería y Sanidá Animal, Rocío Huerta, el director xeneral del Mediu Natural y Planificación Rural, David Villar, y personal técnico de dambos organismos.

Unes de les novedaes de la convocatoria d’anguaño ye que va poder solicitase de forma conxunta’l pagu únicu de la PAC y les ayudes d’incorporación a l’actividá agraria. La conseyería y el FEGA trabayen a comuña p’aplicar esta midida; ye la primer vez que se fai daqué asina a nivel nacional nel Sistema Integráu de Xestión y Control (SIGC), al traviés del que, hasta agora, se solicitaben el pagu únicu y les ayudes agroambientales.

Esta decisión ye un pasu importante pa simplificar los trámites y entainar la xestión, tanto por parte de los solicitantes como de l’Alministración, una y bones los trámites intégrense nuna única plataforma. Esti ye unu de los compromisos qu’adquiriera’l Gobiernu d’Asturies pa impulsar el sector agrícola y ganaderu.

La campaña n’Asturies va superar los 105 millones, ente’l presupuestu de les ayudes directes y los compromisos plurianuales de desenvolvimientu rural, y va llegar a más de 9.000 llabradores y ganaderos. Les entidaes collaboradores yá pueden realizar la precarga de los datos pa les solicitúes, teniendo previsto abrir oficialmente’l plazu a últimos de marzu.

Esti ye un exerciciu de transición primero de la entrada a valir el 1 de xineru del añu próximu de la PAC nueva 2023-2027, polo que tien especial importancia: les decisiones d’anguaño van sirvir de referencia pa l’aplicación de la campaña próxima. Precisamente, nel alcuentru tamién s’analizaron les novedaes que van dexar la transición, y pa lo que ye esencial la coordinación col Ministeriu d’Agricultura, Pesca y Alimentación,  de cuenta qu’Asturies pueda responder a los requisitos normativos de la PAC nueva.

Meyora na dixitalización

Les meyores na dixitalización son otra de les novedaes incluyíes na campaña de la PAC d’anguaño. Destaca la disponibilidá de ferramientes informátiques nueves que ponen a disposición del solicitante tola información sobre la so base territorial (parceles SIGPAC) o derechos asignaos.

Nel alcuentru destacóse l’esfuerzu inversor que tanto’l FEGA como’l Principáu tán realizando na dixitalización del sector primariu. En concreto, tán potenciando l’usu de la ferramienta SXA (Sistema de Xestión d’Ayudes) pa toles xestiones que se realicen al traviés d’una app, que dexa consultar los datos de les declaraciones d’ayuda y tamién realizar fotografíes xeorreferenciaes pa correxir errores o presentar allegaciones.

Nel 2021 Asturies súmase a un proyectu piloto de siguimientu per satélite de les parceles declaraes, de tala forma que’l control de los sos modificaciones realízase de forma semiautomática, con menor posibilidá d’erru y minorando los controles sobre’l terrén.

Otra de les novedaes ye la futura integración de tola información existente nos distintos rexistros de les alministraciones competentes en materia agraria, p’avanzar na simplificación de trámites pa llabradores y ganaderos nun únicu Sistema d’Información d’Esplotaciones Agrícoles (SIEX). Asina, unu de los oxetivos del SIEX ye avanzar na dixitalización del sector agrariu y na simplificación del procedimientu de solicitúes de les ayudes directes de la PAC.​​